Хиймэл оюун ухааны ноцтой ослын үед авах арга хэмжээний тогтолцоо Европын холбоонд хэрэгтэй гэж Финланд, Эстони мэдэгдэв

Европын холбоо хиймэл оюун ухааны ноцтой ослын үед авах арга хэмжээний төлөвлөгөөтэй байх ёстой гэж Финланд, Эстони хиймэл оюун ухааны асуудлаар Баасан гарагт болох гишүүн орнуудын удирдагчдын чухал уулзалтын өмнө мэдэгджээ. Энэ тухай Политико Европ сайт мэдээлэв.

Тус холбоо хөрөнгө оруулалт татаж, тооцоолох хүчин чадлаа нэмэгдүүлбэл хиймэл оюун ухааны “тэргүүн шугамд өрсөлдөх боломжтой хэвээр” байгаа ч үүнийг “хариуцлагатай засаглахтай” хослуулах ёстой гэж хоёр улс Политикогийн үзсэн захидалдаа бичжээ.

Дижитал салбарт Европт тэргүүлэгчдийн тоонд ордог хоёр улс хиймэл оюун ухааны ноцтой ослын үед авах арга хэмжээг Европын холбооны түвшинд зохицуулахыг уриалж байна.

Захидалд Европын тэргүүлэх хиймэл оюун ухааны загваруудад хөрөнгө оруулахыг эдийн засгийн нэн тэргүүний зорилт болгож, хиймэл оюун ухааны ирээдүйд Европын нөлөөллийн суурь болгохыг уриалжээ. Европт хамгийн дэвшилтэт загварууд болон тэдгээрийн аюулгүй байдлын эрсдэлийг бие даан үнэлэх чадавх хэрэгтэй гэж хоёр улс анхааруулж байна.

Европын зөвлөл энэхүү хувьсгалт шинэ технологид зориулсан анхны хурлаа Баасан гарагт хийх бөгөөд хиймэл оюун ухааны аюулгүй байдал, хамгаалалтын асуудал хэлэлцэх асуудалд багтжээ.

Энэ зун хиймэл оюун ухааны агентууд хяналтаас гарч, бусад компанийн системд нэвтэрсэн хэд хэдэн тохиолдол гарснаас хойш Европ хиймэл оюун ухаан ашигласан аюул заналд хариу өгөхөд бэлэн эсэх талаарх санаа зовнил нэмэгдсээр байна. Сүүлийн үеийн кибер халдлага, программын кодын эмзэг байдлын тухай илчлэлтүүд ч хамгаалалтын системүүдийг хиймэл оюун ухааны эринд илүү сайн бэлтгэх шаардлагатай гэсэн санаа зовнилыг төрүүлжээ.

Унгар Политикогийн үзсэн 10 дугаар сарын баримт бичигтээ хиймэл оюун ухааны загвар нийлүүлэгчид загвараа хянах чадвараа алдсан тохиолдолд зориулж үндэсний холбоо барих цэгүүдийн сүлжээ байгуулахыг шаардсан байна. Мөн осол гарахаас өмнө ажиллах, урьдчилан шалгагдсан, аюулгүй байдлын зөвшөөрөлтэй хараат бус үнэлгээчдийн баг байгуулахыг санал болгожээ.