Хойд Солонгосын ажилчдыг хуурамч оюутны бүртгэлээр Орост албадан хөдөлмөрт татан оролцуулж байна
Олон улсын эрх зүйн сангийн тайланд дурдсанаар ажилчид өдөрт 12 цаг, долоо хоногт зургаан өдөр ажиллах ёстой байжээ.
Зуучлагчдын сүлжээ хуурамч оюутны бүртгэл ашиглан Хойд Солонгосын ажилчдыг Орост албадан хөдөлмөрт татан оролцуулж байгааг олон улсын эрх зүйн сан хэдэн сарын мөрдөн шалгалтаар илрүүлжээ. Энэ тухай Аль Жазира мэдээлэв.
Нидерландад төвтэй Глобал Райтс Комплайенс байгууллагын пүрэв гарагт нийтэлсэн тайланд дурдсанаар энэ сүлжээ НҮБ-ын хориг, хөдөлмөрийн хуулийг тойрч гарахын тулд Хойд Солонгосчуудыг оюутны визээр Орост авчирдаг бөгөөд энэ нь Пхеньяны баллистик пуужингийн хөтөлбөрийг санхүүжүүлэхэд тусалдаг төрийн дэмжлэгтэй хөдөлмөрийн хөтөлбөрийн нэг хэсэг юм.
Оросын бизнесмен Владимир Соколовын ажиллуулдаг онлайн зуучлалын платформ Хойд Солонгосын ажилчдыг хөдөө аж ахуй, барилга, үйлдвэрлэл, мэдээллийн технологийн салбарын Оросын ажил олгогчдод санал болгож, нэг ажилтан тутамд 100 мянгаас 150 мянган рублийн шимтгэл авдаг аж.
Ажил олгогч мэт дүр эсгэсэн мөрдөн шалгагчидтай ярилцахдаа Соколовын үйл ажиллагааны захирал Руслан Жуков Хойд Солонгосын ажилчдыг «хөдөлмөрийн хуулийг хэрэглэхээс зайлсхийхийн тулд» тэдний суралцдаггүй коллежид бүртгүүлдэг гэж хэлжээ. Мөн ажилчид өдөрт 12 цаг, долоо хоногт зургаан өдөр ажиллах ёстой гэж ярьсан байна.
2017 оны НҮБ-ын Аюулгүйн зөвлөлийн тогтоолоор гишүүн орнууд Хойд Солонгосын ажилчдыг хүлээн авахыг хориглосон юм. Гэвч хоригийн хэрэгжилтэд хяналт тавьдаг 11 орны багийн мэдээллээр 2025 онд гадаадад Хойд Солонгосын 35600-101280 ажилчин ажиллаж байжээ. Орос 2025 онд Хойд Солонгосчуудад 36 мянга гаруй виз олгосон нь өмнөх оныхоос дөрөв дахин их бөгөөд бараг бүгд албан ёсоор боловсролын зорилготой байсан аж.
Жуков тайлангийн буруутгалыг «худал, зохиомол» гэж бүхэлд нь няцаасан байна. «Хойд Солонгосын ажилчид нэг дор хоёр улсад үйлчилдэг сүлжээгээр Оросын үйлдвэрүүдэд илгээгдэж байна. Тэдний хөдөлмөр Украины дайнтай холбоотой газрууд зэрэг Оросын үйлдвэрлэлийг тэтгэж, олсон орлого нь Хойд Солонгосын цэргийн хөтөлбөрийг санхүүжүүлдэг» гэж байгууллагын бизнес, хүний эрхийн хэлтсийн дарга Лара Стрейнгвейз мэдэгджээ.
Хойд Солонгос, Орос хоёр 2024 онд харилцан хамгаалах гэрээ соёрхон баталж, Пхеньян Украины дайнд Оросын цэргийн талд тулалдахаар олон мянган цэрэг илгээсэн юм.
