Руандагийн Батлан хамгаалах яам Конгогийн босогчдыг дэмжсэн гэх үндэслэлээр АНУ-ын хоригт өртжээ
Вашингтон Кигалиг хөршөөсөө цэргээ гаргаж, босогчдод үзүүлж буй дэмжлэгээ зогсоохыг шахаж байна.
АНУ Бүгд Найрамдах Ардчилсан Конго Улсын зүүн хэсэгт тулалдаж буй босогч бүлэглэлийг тэтгэхэд тусалж байна гэж буруутган Руандагийн Батлан хамгаалах яаманд хориг тавьжээ. Энэ тухай Африканьюс мэдээлэв.
Вашингтон хөршөөсөө цэргээ гаргаж, бүлэглэл болон түүний улс төрийн жигүүр болох Конго голын эвсэлд үзүүлж буй дэмжлэгээ зогсоохыг Кигалид шахахыг зорьж байна. Мөн босогчдод Руандагийн дэмжлэг үзүүлэхэд гол үүрэг гүйцэтгэдэг гэх Зигама зээл, хадгаламжийн нийгэмлэгт хориг тавьжээ.
АНУ-ын Сангийн яамны мэдээлснээр Руандагийн Батлан хамгаалах яам армидаа Конгогийн зүүн хэсгийн Хойд болон Өмнөд Киву мужуудад олон мянган цэрэг байршуулахыг тушаасан бөгөөд Руандагийн цэргүүд босогчидтой хамтран ажиллагаа явуулж, тэдэнд цэргийн техник, сургалт болон бусад дэмжлэг үзүүлсэн байна.
НҮБ босогч бүлэглэлийг Руанда дэмждэг гэж мэдэгдсэн ч Кигали үүнийг удаа дараа үгүйсгэж ирсэн. Конгогийн Гадаад хэргийн яам хоригийг сайшаажээ.
Хориг Руанда, Конгогийн удирдагчид Вашингтонд АНУ-ын зуучлалаар мөргөлдөөнийг зогсоох энхийн гэрээнд гарын үсэг зурснаас хойш хэдэн сарын дараа тавигдаж байгаа бөгөөд газар дээр тулаан үргэлжилсээр байна. АНУ-ын Сангийн сайд Скотт Бессент энэ арга хэмжээ нь Кигалид энхийн гэрээний дагуу хүлээсэн үүргийнх нь хариуцлагыг хүлээлгэх зорилготой гэжээ.
Босогч бүлэглэл 2021 онд Конгогийн зүүн хэсэгт томоохон хүч болон сэргэж, 2025 оны эхээр Гома, Букаву зэрэг гол хотуудыг эзэлсэн юм.
