Хонконгийн хууль тогтоох байгууллагын хуулийн алба газрын бүртгэлийн дүрмийг тодруулахыг Засгийн газраас хүсэв

Хонконгийн Хууль тогтоох зөвлөлийн хуулийн алба хэвлэл мэдээллийнхний нэвтрэлтийг чангалсан шинэ журмын дагуу газрын бүртгэлд нийтийн эрх ашгийн үндэслэлээр нэвтрэх хүсэлтийг хэрхэн авч үзэхээ тодруулахыг Засгийн газраас хүсчээ гэж Хонконг Фри Пресс сайт мэдээлэв.

Шинэ дэд хууль тогтоомжоор хайлтыг эрдэм шинжилгээ, зах зээлийн судалгаа зэрэг есөн зорилгоор л хийж болох юм. Мэдээ бэлтгэх нь эдгээрт багтаагүй ч нийтийн эрх ашиг хүчинтэй үндэслэл гэж тооцогдсон байна.

Хүсэлтийг Газрын бүртгэлийн дарга тохиолдол бүрээр, буруугаар ашиглах боломж зэрэг бүх холбогдох хүчин зүйлийг харгалзан хянах аж.

Хуулийн туслах зөвлөх Ванесса Чэн Хөгжлийн товчоонд Баасан гарагт илгээсэн захидлаа Мягмар гарагт хууль тогтоох байгууллагад хэлэлцүүлэхээр өргөн барьжээ. Тэрбээр нийтийн эрх ашгийн хүсэлтийн жишээний жагсаалт гаргах эсэх, шалгуурыг хуульд оруулах эсэх, эс бөгөөс нарийвчилсан шалгуурыг удирдамжид нийтэлж олон нийтийн санал авах эсэхийг асуусан байна.

Мөн татгалзсан шалтгааныг бичгээр өгөх эсэх, татгалзахаас өмнө өргөдөл гаргагчид нэмэлт тайлбар өгөх боломж олгох эсэх, хянах буюу давж заалдах механизм бий болгох эсэхийг асуужээ.

Хэвлэлийн салбарыг төлөөлдөг гишүүн Кеннет Фок дэд хороонд бичсэн захидалдаа хэвлэл мэдээллийнхэнд Газрын бүртгэлд нэвтрэх хязгаарыг багасгах нь зүйтэй гэж үзжээ.

«Хэвлэл мэдээллийнхэн хайлт хийхдээ тодорхой дүрэм мөрдөх ёстой гэдэгтэй санал нэг байна, гэхдээ эрх баригчид хувийн нууц, олон нийтийн мэдэх эрхийг зохистой тэнцвэржүүлж, хууль ёсны сэтгүүл зүйд хатуу байхаасаа зөөлөн хандах зарчмыг баримтлах ёстой» гэж тэрбээр бичсэн байна.

Хөгжлийн товчоо өнгөрсөн сард хууль тогтоох байгууллагад өгсөн баримт бичигтээ шинэ журам хувийн мэдээллийн нууц, бүртгэлийн ил тод байдлын тэнцвэрийг хангана гэжээ. Харин Хонконгийн Сэтгүүлчдийн холбоо нэмэлтийг хойшлуулахыг уриалж, шинэ журам үл хөдлөх хөрөнгийн зах зээлд хяналт тавих олон нийт, хэвлэл мэдээллийн чадварыг сулруулна гэж үзсэн байна.