Хонконгийн шинжлэх ухаан, технологийн их сургуулийн захирал Нэнси Ип ЮНЕСКО-гийн амь судлалын шагнал хүртжээ

ЮНЕСКО, Экваторын Гвинейн нэрэмжит амь судлалын олон улсын шагналыг Хонконгийн шинжлэх ухаан, технологийн их сургуулийн захирал Нэнси Ип хүртснийг Чайна Ньюс сайт мэдээлжээ. Шагналыг 10 дахь удаагаа гардуулах ёслол 11 дүгээр сарын 6-нд Парис дахь ЮНЕСКО-гийн төв байранд болсон бөгөөд Ип Хятадын Шинжлэх ухааны академийн академич юм.

ЮНЕСКО-гийн мэдээлснээр Ип мэдрэл судлалын салбарт оруулсан онцгой хувь нэмрээрээ шагнагдсан. Тэрбээр шинэ биомаркер, удамшлын эрсдэлт хүчин зүйлсийг илрүүлж, Альцгеймерийн өвчнийг эрт оношлох, явцыг хянахад туслах цусны шинжилгээний технологи боловсруулжээ.

Ип мэдрэлийн доройтлын өвчний генийн эмчилгээний чиглэлээр анхдагч судалгаа хийсэн юм.

Шагнал гардах үеэрээ Ип энэ амжилт судалгааны баг болон хамтран судлаачдын хүчин чармайлтын үр дүн гэж хэлээд, их сургууль болон гэр бүлдээ талархал илэрхийлэв. Тэрбээр шинжлэх ухааны судалгаа хүн төрөлхтний амьдралыг сайжруулахад илүү үйлчлэх ёстойг онцолж, салбар хоорондын олон улсын хамтын ажиллагааг бэхжүүлэхийг уриалсан байна.

Энэ удаагийн шагналын нөгөө хоёр эзэн нь Испанийн Сарагосагийн их сургуулийн профессор Мартин Монтаньес, Мароккогийн Фес хот дахь Сиди Мохаммед бен Абдалла их сургуулийн нэгэн профессор юм. Тэд сүрьеэгийн сулруулсан амьд вакцин боловсруулах, бичил биетний эсрэг эмэнд тэсвэржих асуудлыг шийдвэрлэхэд оруулсан хувь нэмрээрээ шагнагджээ.

Энэхүү шагналыг ЮНЕСКО-гийн Гүйцэтгэх зөвлөл 2008 онд байгуулсан ба Экваторын Гвиней Бүгд Найрамдах Улс санхүүжүүлдэг.