Хонконгийн цагдаа гэмт хэрэгтнүүд хиймэл оюуныг ашиглах нь ихэссэнийг анхааруулжээ

Гэмт хэрэгтнүүд технологийн гэмт хэрэг үйлдэхэд хиймэл оюуныг улам их ашиглах болсноор энэ оны эхний гурван улиралд золиосны программын хэрэг нэмэгдсэнийг Хонконгийн цагдаа анхааруулсныг Эр Ти Эйч Кей радио мэдээлжээ.

Ийм хэргийн тоо өмнөх оны мөн үеэс 18 хувиар өсч 40 болсон бол технологийн гэмт хэргийн нийт тоо 12 хувиар буурч 21573 болж, нийт хохирол 15 хувиар буурч бараг гурван тэрбум есөн зуун сая Хонконг долларт хүрчээ.

«Хиймэл оюуны хэрэглээ халдлагын хурд, хэмжээ, нэвтрэх чадварыг илт нэмэгдүүлж, халдлагыг илүү үр дүнтэй болгож байна» гэж Кибер аюулгүй байдал, технологийн гэмт хэргийн товчооны ахлах ахлагч Реймонд Лам хэлсэн байна.

Түүний хэлснээр, гэмт хэрэгтнүүд хүний хяналт багатайгаар даалгавар гүйцэтгэдэг бие даасан хиймэл оюуны агентуудыг системийн болон эмзэг байдлын скан, нэвтрэлт зэрэг халдлагад өргөн ашиглаж байна.

Хонконг Интерполын хиймэл оюунд суурилсан жил үргэлжлэх анхны кибер ажиллагаанд нэгдэж, цагдаагийн бүтээсэн шинжилгээний системээр эрсдэлтэй сайтуудыг хааж байна. Интерполын мэдээллээр, мэдээллийг 47 улстай хуваалцаж, шалгасан 57 мянга орчим холбоосын 90 орчим хувийг нэвтрэх боломжгүй болгожээ.

Таван тивийн 20 гаруй улсыг хамарсан ажиллагааны хоёрдугаар үе шат өнгөрсөн сард эхэлсэн.