Хоёр орны харилцаа хүйтэрч, Японы компаниуд Хятадаас гарч байна

Сүүлийн хоёр жилийн хугацаанд 4 мянга гаруй Японы компани Хятад дахь үйл ажиллагаагаа хааж эсвэл гарсан нь нийт тоог 2010 оноос хойших хамгийн бага түвшинд хүргэжээ. Энэ тухай Ниппон.ком сайт мэдээлэв.

Тэйкоку Датабанкийн судалгаагаар, 2026 оны 6 дугаар сарын байдлаар Хятадад Японы 10118 компани үйл ажиллагаа явуулж байсан нь судалгааг анх 2010 онд хийж, 10778 компани байснаас хойших хамгийн бага тоо юм. Энэ нь 2024 оны өмнөх судалгааныхаас 20 гаруй хувиар, 2012 оны оргил үеийнхээс 30 орчим хувиар бага байна.

Хятадад (Хонконг, Макаог оруулахгүйгээр) үйл ажиллагаа явуулж буй компани бүрийн үйл ажиллагааг шинжилсэн есдүгээр судалгааны үр дүн Япон-Хятадын харилцаа муудаж буй энэ үед Японы компаниудын Хятад дахь үйл ажиллагаа илт агшиж байгааг харуулжээ. Өмнөх судалгаанаас хойшхи хоёр жилд 1221 компани охин компани, үйлдвэр, төлөөлөгчийн газар байгуулж Хятадын зах зээлд шинээр орсон бол 4137 компани гарсан буюу байршил нь тодорхойгүй болсноор цэвэр бууралт 2916 компани болжээ.

Жилийн борлуулалт нь 1 тэрбум иенээс доош жижиг, дунд үйлдвэрүүдийн эзлэх хувь өмнөх судалгаатай харьцуулахад буурсан бол 1 тэрбум иен ба түүнээс дээш борлуулалттай дунд болон том корпорацуудын хувь нэмэгджээ. Шанхай 3961 компанитайгаар буюу нийт тооны 40 орчим хувийг эзэлж тэргүүлсээр байгаа ч тэнд ажиллаж буй компанийн тоо өмнөх судалгаанаас 1085 буюу 21.5 хувиар буурсан байна.

Салбараар нь авч үзвэл, аж үйлдвэр 4206 компанитайгаар хамгийн их буюу 40 орчим хувийг эзэлж, удаах нь бөөний худалдаа (3320 компани), үйлчилгээ (1213 компани) байв. Эдгээр гурван салбар нийт компанийн 86 хувийг эзэлж байна. Санхүү, даатгалын салбарт өмнөх судалгааны 414-өөс буурч 343 компани ажиллаж байгаа ч энэ нь 2010-аад оны эхний хагасынхтай харьцуулахад өндөр хэвээр бөгөөд Шанхай нь Хятад болон Азийн санхүүгийн төв хэвээр байгааг илтгэж байна.