Хямрал нь гүнзгийрсэн Хоумплас сүлжээ дэлгүүрийн үйлдвэрчний эвлэл засгийн газраас тусламж хүсчээ

Шүүхийн удирдлагаар нөхөн сэргээх ажиллагаанд орсон Өмнөд Солонгосын Хоумплас супермаркетын сүлжээ нийлүүлэгчдийн төлбөр, цалин, ашиглалтын зардлаа төлж чадахгүй болж, хямрал нь гүнзгийрч байгааг салбарын албаныхан Лхагва гарагт мэдэгджээ. Энэ тухай Корея Таймс сонин мэдээлэв.

Худалдан авагч удаан олдохгүй байгаа нь компанийн ирээдүйг улам тодорхойгүй болгожээ.

Хоумплас зээлжих зэрэглэл нь буурсны дараа өнгөрсөн оны 3 дугаар сард Сөүлийн дампуурлын шүүхэд нөхөн сэргээх хүсэлт гаргасан юм. Дараа нь зарим дэлгүүрээ хааж, энэ оны 8 дугаар сарын дундуур заримыг нь дахин нээсэн ч борлуулалт сул, нийлүүлэлт тасалдсаар байна.

Салбарын эх сурвалжийн хэлснээр, Хоумплас 10 дугаар сарын 30-нд зарим шинэ хүнсний нийлүүлэгчдийн төлбөрийг бүрэн бэлнээр төлж чадаагүй аж. Хөдөө аж ахуй, далайн бүтээгдэхүүний төлбөрийн 90 хувийг бэлнээр төлж, үлдсэнийг нь нийлүүлэгчдийн барьцаа хөрөнгөөс суутгажээ. Зарим нийлүүлэгч барьцаа нь дуусах хүртэл бараа нийлүүлэхээс татгалзаж байгаа гэнэ.

Хоумплас ажилчдад 8 дугаар сарын цалингийн талыг өгөөгүй хэвээр бөгөөд 9, 10 дугаар сарын цалин тодорхойгүй байна. Тус компани тэтгэмжийн мөнгө олж чадаагүй тул 400 орчим хүн хамрагдах сайн дурын тэтгэвэрт гарах хөтөлбөрөө цуцалжээ.

Хаалттай зарим дэлгүүрт нийт 10 тэрбум орчим воны (7.5 сая ам.доллар) төлбөр төлөөгүйн улмаас цахилгаан тасална гэх анхааруулга ирсэн гэнэ. Сүүлийн үеийн борлуулалт зорилтынхоо 30 хувьд ч хүрэхгүй байна. Хоумплас, түүний худалдааны зөвлөх Самил Пи Даблью Си тодорхой худалдан авагч олдоогүй тул 10 дугаар сарын сүүлийн тендерийн хугацааг цуцалсан байна.

“Удахгүй худалдан авагч олдохгүй бол бүх дэлгүүр дахин үйл ажиллагаагаа зогсоох хамгийн муу хувилбараас зайлсхийхэд хэцүү болно” гэж үйлдвэрчний эвлэл 11 дүгээр сарын 3-нд Үндэсний ассамблейд хийсэн хэвлэлийн бага хурлын үеэр мэдэгджээ.

Засгийн газар 7 дугаар сард 550 тэрбум воны дэмжлэгийн багц зарласан ч ихэнх нь хуучин ажилчдад олгох хөнгөлөлттэй зээл зэрэг шууд бус тусламж байсан юм. Эвлэл тусламжийг үйл ажиллагааны зардалд чиглүүлэхийг хүсэж байгаа ч эрх баригчид хувийн компанид шууд санхүүжилт олгохоос татгалзаж байна. Онлайн худалдаа руу шилжих хандлага уламжлалт гипермаркетуудыг сулруулж байгаа тул Хоумплас бүтцийн сорилттой ч тулгарч байна.