Хятадын Имяньпо тосгонд Оросын матрёшкад зориулсан сэдэвчилсэн парк байгуулахыг хүсэж байна

Хятадын зүүн хойд хэсэгт орших Хэйлунжян мужийн Имяньпо тосгонд Оросын матрёшкад зориулсан сэдэвчилсэн парк байгуулах хүсэлтэй байгааг урлаач Юй Жин РИА Новости агентлагт ярилаа. Тэрбээр уламжлалт орос матрёшка үйлдвэрлэдэг «Чанъин» үйлдвэрийг төлөөлдөг.

Хятадын жишгээр жижиг гэж тооцогдох Имяньпо тосгонд 15 мянга орчим хүн амьдардаг бөгөөд оршин суугчдын бараг тавны нэг нь уламжлалт орос матрёшка үйлдвэрлэдэг. Хятадын талын тооцоогоор Хятад болон гадаадын зах зээлд байгаа матрёшкын 90 орчим хувийг Имяньпо үйлдвэрлэдэг. Орон нутгийн урлаачид олон арван жилийн турш гараар хийх уламжлалт аргаа хадгалсаар ирсэн байна.

“Матрёшка аль хэдийн Имяньпо тосгоны гол онцлог болсон. Бид матрёшкад зориулсан сэдэвчилсэн парк байгуулж, улмаар аялал жуулчлалын салбарыг хөгжүүлэх илүү том төлөвлөгөө гаргаж магадгүй” гэж Юй Жин хэлэв.

Орон нутгийн удирдлага энэ санаачилгад онцгой анхаарал хандуулж байгааг ч Юй Жин дурджээ. “Төсөл ирээдүйд заавал хэрэгжинэ гэдэгт би итгэж байна” гэж тэрбээр хэлээд, орон нутгийн удирдлагатай хамтран төслийг урагшлуулахыг зорьж байгаагаа нэмж хэлжээ.

Имяньпо тосгон Чин гүрний үед буюу 1875 оны орчим байгуулагдсан бөгөөд XIX зууны сүүлээр Хятадын зүүн төмөр замын барилгын ажил эхэлснээр хөгжлийн шинэ түлхэц авсан юм. Удалгүй энд төмөр замын өртөө баригдаж, тосгон тээвэр, худалдааны чухал зангилаа болжээ.

Төмөр замын тээвэр хөгжихийн хэрээр Оросын төмөр замчид, инженерүүд, худалдаачид гэр бүлийн хамт энд нүүн ирсэн бөгөөд тэд Имяньпод өөрсдийн барилгын хэв маягийг авчирч, матрёшка хийх зэрэг төрөл бүрийн гар урлалыг нэвтрүүлсэн байна.