Киргизэд олон хүүхэд захад ажиллаж байхад хөдөлмөрийн байцаагч 2025 онд 28-хан байв
Ядуу өрхийн хүүхэд хөдөлмөрт илүү татагдаж байгааг судалгаа харуулжээ.
Киргизийн өмнөд хэсгийн Манас хотын захаас олон арван хүүхэд ажиллаж байгаа нь илэрчээ гэж Таймс оф Сентрал Эйша сайт мэдээлэв.
Цагдаа, нийгмийн ажилтнууд эцэг эх, асран хамгаалагчидтай ярилцаж, анхааруулга өгсөн байна.
Үндэсний статистикийн хороо НҮБ-ын Хүүхдийн сантай хамтран хийсэн судалгаагаар 2023 онд 5-17 насны хүүхдийн 19.6 хувь хөдөлмөрт оролцжээ. Энэ үзүүлэлт Нарын мужид 31, Жалал-Абадад 24, Бишкект 5 хувь байв.
Хамгийн ядуу өрхийн хүүхдийн 26, хамгийн чинээлэг өрхийнхийн 8 хувь хөдөлмөрт оролцдог аж. Хөвгүүдэд 23, охидод 16 хувь ногдсон байна.
Гэтэл 2025 онд улсад хөдөлмөрийн ердөө 28 байцаагч ажиллаж байсан юм. АНУ-ын Хөдөлмөрийн яам энэ тоог 144 хүртэл нэмэхийг зөвлөжээ.
Байцаагчид 2025 онд 1173 шалгалт хийж, 1885 зөрчил илрүүлсэн ч хэд нь хүүхдийн хөдөлмөртэй холбоотойг яам заагаагүй байна.
Бизнесийн шалгалтын хоригийг 2025 оны 2 дугаар сард цуцалсан ч 2026 оны 3 дугаар сард шинээр тогтоожээ. Энэ хориг 12 дугаар сарын 31 хүртэл үргэлжлэх бөгөөд гомдлоор шалгах нь хоригт хамаарахгүй аж.
Киргиз 2016 оноос ЕХ-ны худалдааны хөнгөлөлт эдэлж байгаа бөгөөд Европын комисс 2026 оны 7 дугаар сард байцаагчийн албыг илүү сайн хангахыг шаардсан юм.
