Нигерийн Ерөнхийлөгч 7.7 тэрбум ам.долларын шинэ зээл батлуулахаар парламентад хүсэлт гаргав
Өмнөх хүсэлтэд 20.5 тэрбум ам.доллар, 1.05 тэрбум евро зээлэхээр тусгаж байжээ.
Нигерийн Ерөнхийлөгч Бола Тинубу төсвийн алдагдлаа хэсэгчлэн санхүүжүүлэх 7.7 тэрбум ам.долларын гадаад зээлийн шинэ төлөвлөгөөг батлахыг парламентаас хүсчээ гэж Премиум Таймс сонин мэдээлэв.
Тэрбээр ийнхүү өмнө нь гаргасан илүү том хэмжээний зээлийн хүсэлтээ буцаан татсан байна.
Сенатын дарга Годсвилл Акпабио Лхагва гарагт захидлыг уншиж танилцуулаад, хүсэлтийг холбогдох хороодод шилжүүлжээ.
Шинэ зээлийг дэд бүтэц, батлан хамгаалах, хөдөө аж ахуй, эрүүл мэнд, эрчим хүч, боловсролын төслүүдэд зарцуулах аж.
Тинубугийн хэлснээр зээлийг хэд хэдэн хэлбэрээр босгох бөгөөд хурдан, харьцангуй хямд гэсэн үндэслэлээр евро бондод түлхүү анхаарна. Хүү, эргэн төлөх хугацааг зөвхөн үнэ тогтоох үед мэдэх юм.
Парламент 3 дугаар сард 6 тэрбум ам.долларын гадаад зээлийн төлөвлөгөө баталсан байна.
Нигерийн өрийн дарамт сүүлийн жилүүдэд нэмэгдэж, улсын орлогын нэлээд хэсэг өрийн үйлчилгээнд зарцуулагдаж байгаа нь дэд бүтэц, нийтийн үйлчилгээний хөрөнгийг хязгаарлаж байна.
