Криптовалютын хулгай олон улсын аюулгүй байдалд ноцтой нөлөөтэй гэж Өмнөд Солонгосын дэд сайд мэдэгдэв

Сүүлийн үед гарч буй криптовалютын хулгай олон улсын аюулгүй байдалд ноцтой нөлөөтэй гэж Өмнөд Солонгосын Гадаад хэргийн стратеги, тагнуул хариуцсан дэд сайд Жон Ён Ду мэдэгджээ. Энэ тухай Корея Таймс сонин тус яамыг иш татан мэдээлэв.

Тэрбээр Мягмар гарагт Вена хотод Өмнөд Солонгос, Европын аюулгүй байдал, хамтын ажиллагааны байгууллагын хамтран зохион байгуулсан кибер аюулгүй байдлын бага хурлын үеэр ийн хэлжээ. Хойд Солонгосыг өнгөрсөн сарын сүүлээр Бинанс биржээс 6 тэрбум гаруй ам.долларын криптовалют хулгайлсан гэж буруутгаад байгаа юм.

Яамны мэдээллээр, Жон ийм хэрэг нь энгийн кибер гэмт хэргээс давсан ач холбогдолтой гэж онцолжээ. Хиймэл оюунд суурилсан халдлага урьд өмнө байгаагүй хурд, цар хүрээтэй болж болзошгүй тул хиймэл оюуны эрин үед тохирсон шинэ хандлага хэрэгтэй гэж тэрбээр уриалсан байна.

Мөн Энэтхэг-Номхон далайн бүс, Европын аюулгүй байдал харилцан уялдаатай гэдгийг тэмдэглэж, хоёр талын хамтын ажиллагааны ач холбогдлыг тэрбээр онцолжээ.

Бага хуралд Япон, Австрали, Тайланд, Афганистан, Катарын төлөөлөгчид, кибер аюулгүй байдлын мэргэжилтнүүд зэрэг 100 орчим хүн оролцжээ. Сөүлийн засгийн газар үндэстэн дамнасан аюулгүй байдлын сорилтод хариу арга хэмжээ хэлэлцэх зорилгоор 2017 оноос хойш энэ бага хурлыг жил бүр зохион байгуулдаг юм.