Ли Жэ Мён Солонгосын дайны үеийн төрийн хүчирхийллийн хохирогч энгийн иргэдийн нэр төрийг сэргээнэ гэж амлажээ

Өмнөд Солонгосын Ерөнхийлөгч Ли Жэ Мён 1950-53 оны Солонгосын дайны үед төрийн хүчирхийллийн улмаас амь үрэгдсэн энгийн иргэдийн нэр төрийг сэргээх хүчин чармайлт гаргахаа Баасан гарагт амласныг Кореа Таймс сонин мэдээлжээ.

Тэрбээр Сөүл хотын захиргаанд болсон, Солонгосын дайны өмнө, дайны үеэр болон дараа нь төрийн хүчирхийллийн хохирогч болсон энгийн иргэдийн хамтарсан дурсгалын арга хэмжээнд мэндчилгээ илгээжээ. Мэндчилгээг ерөнхийлөгчийн нийгмийн эв нэгдэл хариуцсан нарийн бичгийн дарга Жон Сон Хван уншиж танилцуулсан байна.

«Өнгөрсөнд төрийн нуун дарагдуулсан үнэнийг илчилж, түүхийн бурууг засах нь өнөөгийн төрийн биелүүлэх ёстой үүрэг юм» гэж Ли Жэ Мён хэлжээ.

Дайны эхэн үе буюу 1950 онд Хойд Чүнчон мужийн Ногынри тосгонд Америкийн цэргүүд Хойд Солонгосын цэргүүд нуугдсан гэж үзэн Өмнөд Солонгосын дүрвэгсэд рүү гал нээж, олон зуун энгийн иргэн амь үрэгдсэн гэх мэдээлэл бий. Энэ хэрэг ил болсны дараа Өмнөд Солонгос ижил төстэй хэргүүдийг шалгах Үнэн ба эвлэрлийн комиссыг 2005 онд байгуулсан юм.

Ерөнхийлөгч Тэжон хотод төрийн хүчирхийллийн хохирогчдын дурсгалын байгууламжийг шуурхай барихаа амласан байна.