Өмнөд Солонгос санхүүгийн байгууллагуудын сүлжээ тусгаарлах дүрмийг хиймэл оюунд суурилсан хамгаалалтаар солихоор болжээ

Өмнөд Солонгосын санхүүгийн эрх бүхий байгууллагууд хиймэл оюун ухаан ашигласан нарийн кибер халдлагаас хамгаалахын тулд санхүүгийн компаниудын дотоод сүлжээг интернэтээс тусгаарлах олон жилийн дүрмийг үе шаттайгаар цуцлахаар төлөвлөж байгааг Кореа Таймс сонин мэдээлжээ.

Санхүүгийн үйлчилгээний хорооны дарга Ли Ок Вон энэ сард ажлын хэсэг байгуулж, ирэх оны эхний улиралд багтаан «хиймэл оюуны халдлагыг хиймэл оюунаар сөрөх» зарчимд тулгуурласан аюулгүй байдлын шинэ тогтолцооны төлөвлөгөө боловсруулна гэж Пүрэв гарагт мэдэгджээ.

Дүрмийг бүх салбарт нэг дор бус, кибер эрсдэлээ удирдах чадвар сайтай байгууллагуудаас эхлэн үе шаттай хэрэгжүүлнэ.

Уг дүрмийг 2013 онд хэд хэдэн банк, телевизийн компьютерийн системийг саатуулсан томоохон кибер халдлагын дараа нэвтрүүлсэн юм. Харин санхүүгийн компаниуд үүлэн үйлчилгээ, өндөр хүчин чадалтай хиймэл оюуны системд хандах хязгаарлалт нь халдлагыг илрүүлэх, сөрөх чадварыг нь сааруулж байна гэж үздэг.

Донгук их сургуулийн профессор Хван Сок Жин сүлжээ тусгаарлалт гадны халдлага санхүүгийн чухал системд тархахаас сэргийлж ирсэн тул бүрэн цуцлахын оронд систем, мэдээллийн ач холбогдлоос хамааран өөр өөр түвшний тусгаарлалт хэрэглэхийг зөвлөжээ.

9 дүгээр сарын 30-нд Шинхан банкны мэдээлэл алдагдсан нь батлагдсанаас хойш Мягмар гараг хүртэл эрх бүхий байгууллагад 37 компанийн 40 аюулгүй байдлын зөрчлийн мэдээлэл ирсэн байна. Эдгээр зөрчлөөр 473 мянга гаруй бүртгэл задарчээ.