Өмнөд Солонгос эцэг тогтоолгох хэрэг нь шүүхэд хянагдаж буй гадаад хүүхдүүдэд урт хугацааны виз олгоно

Солонгос эцгээ хуулийн дагуу тогтоолгохоор шүүхэд хандсан гадаад хүүхдүүд шүүх хурлын үеэр урт хугацаагаар оршин суух, асран хамгаалагч нь хууль ёсоор ажиллах боломжтой болсныг Кореа Таймс сонин мэдээлжээ.

Хууль зүйн яамны Баасан гарагт танилцуулсан шинэ журмаар иргэншилгүй хүүхэд, тэдний асран хамгаалагч эцэг эх нь хүмүүнлэгийн урт хугацааны визийг шүүх маргаан үргэлжлэх хугацаанд зургаан сар тутам сунгуулан авах эрхтэй болжээ. Хүний эрхийн хорооны хяналтын дараа эцэг эх, асран хамгаалагчдад түр ажиллах зөвшөөрөл олгох юм.

«Энэ арга хэмжээ нь шүүх хурлын үеэр солонгос удамтай хүүхдүүд, тэдний асран хамгаалагчдыг зовлонгоос хамгаалах төрийн хүмүүнлэгийн хамгийн бага үүргийг биелүүлэх зорилготой» гэж Хууль зүйн сайдын үүрэг гүйцэтгэгч Ли Жин Су хэлжээ.

Өмнө нь эцэг тогтоолгох нэхэмжлэл гаргахаар богино хугацааны жуулчны визээр ирсэн гадаад эцэг эхчүүд 90 хоногоос илүү байх эрхгүй байсан бол шүүх хурал жил ба түүнээс дээш үргэлжилдэг. Хүмүүнлэгийн үндэслэлээр визийг түр сунгасан ч ажиллахыг хориглодог байжээ.

Солонгосын иргэншлийн хуулиар эцгийн холбоог тогтоох нь хүүхэд Солонгосын иргэншил, тэтгэлэг, өв залгамжлах эрх авах урьдчилсан нөхцөл болдог.

Шинэ журмаар өргөдөл гаргагч шүүхэд хэрэг хянагдаж буйг нотолж, гэрэл зураг, захидал харилцаа, ДНХ-ийн шинжилгээ зэрэг биологийн холбоо байх магадлалыг харуулах анхны нотолгоо гаргах ёстой. Зөвшөөрөл авсан хүмүүс биеийн хүчний ажил зэрэг мэргэжлийн бус салбарт ажиллах боломжтой ч насанд хүрэгчдийн зугаа цэнгэл, мөрийтэй тоглоомын газарт ажиллахыг хориглосон байна.