Нефтийн үнэ өсч, Брент баррель нь 92.3 ам.доллар орчимд арилжаалагдаж байна

Нефтийн үнэ өмнөх арилжаагаар хоёр сарын доод түвшинд хүрсний дараа Лхагва гарагт өсчээ. Энэ тухай Интерфакс агентлаг мэдээлэв.

Брент нефтийн 1 дүгээр сарын фьючерсийн үнэ Москвагийн цагаар 8:20-ийн байдлаар Лондонгийн Ай Си И биржид баррель нь 92.29 ам.доллар болж, өмнөх хаалтаас 0.8 ам.доллар буюу 0.87 хувиар өссөн байна. Мягмар гарагт эдгээр гэрээ 1.08 ам.доллар буюу 1.17 хувиар хямдарч, 91.49 ам.долларт хүрч байжээ.

Нью-Йоркийн түүхий эдийн биржийн цахим арилжаанд Дабл-Ю Ти Ай нефтийн 12 дугаар сарын фьючерс 0.46 ам.доллар буюу 0.53 хувиар үнэд хүрч, 86.5 ам.доллар болжээ. Өмнөх арилжаагаар 0.81 ам.доллар буюу 0.93 хувиар буурч, 86.04 ам.долларт хүрсэн юм.

АНУ, Ираны мөргөлдөөн намжина гэсэн найдвар өмнөх өдөр зах зээлийг уналтад хүргэсэн ч Ормузын хоолойд хөлөг онгоцонд хийх халдлага үргэлжилж байгаад арилжаачид санаа зовж байна.

Мягмар гарагт Их Британийн Далайн худалдааны үйл ажиллагааны алба Оманы Мусандам мужийн ойролцоо, Лима боомтоос зүүн хойш 19 далайн миль зайд танкер халдлагад өртсөнийг мэдээлжээ. Исламын хувьсгалт харуулын корпус өмнөх өдөр нь Тегераны зөвшөөрөөгүй замаар явсан гурван танкерийг дэлбэлснээ мэдэгдсэн байна.

Вашингтоны Ойрхи Дорнодын бодлогын хүрээлэнгийн мэдээлснээр, 10 дугаар сард бүс нутагт 37 хөлөг онгоц халдлагад өртсөн нь Ойрхи Дорнодын дайн эхэлснээс хойших сарын хамгийн өндөр үзүүлэлт юм.

Зах зээлийн анхаарал энэ долоо хоногийн сүүлээр гарах АНУ-ын эрчим хүчний нөөцийн тайланд хандаж байна. Америкийн нефтийн хүрээлэнгийн урьдчилсан тооцоогоор, нефтийн нөөц 9 сая баррелиар нэмэгджээ.