Оросын төлөөлөгчид Донбассаас эзэлсэн нутгаа хэтрүүлсэн гэж Зеленский мэдэгдэв

Абу Дабид болж буй хэлэлцээний үеэр Оросын төлөөлөгчид Донбассаас эзэлсэн нутгийнхаа хэмжээг хэтрүүлэн хэлсэн гэж Украины Ерөнхийлөгч Владимир Зеленский мэдэгджээ. Энэ тухай Медуза мэдээлэв.

Украины төлөөлөгчдийн илтгэлийг иш татсан Зеленскийн хэлснээр, Орос бодит байдал дээр Украины хяналтад байгаа Донбассын талыг аль хэдийн эзэлсэн гэж баталж байгаа аж. Тэдгээр нь цэргийн офицерууд, Оросын тагнуулынхан байсан бөгөөд Украины баг эдгээр нутаг Украины хяналтад байгааг нотлох видео бичлэг, зураг, бусад баримт бий гэж хариулсан байна.

Зеленский Владимир Путиныг өөр бодит байдалд амьдарч байна гэж үзэж, зүүн Украиныг бүрэн эзлэхэд нэг хоёр сар хэрэгтэй гэж Путин америкчуудад ярих нь мэдээж гэжээ. “Би ч бас Оросыг бүхэлд нь эзэлсэн зураг түүнд зурж өгч чадна” гэж Украины Ерөнхийлөгч хэлсэн байна.

АНУ тулалдааны талбарын байдлын талаарх Украины үнэлгээг баталсан гэж Зеленский нэмж хэлээд, “Тийм учраас бид удирдагчдын түвшинд суугаад ярилцах хэрэгтэй” гэжээ.

Орос, Украины АНУ-ын оролцоотой хэлэлцээний эхний өдөр 11 дүгээр сарын 10-нд Абу Дабид болсон юм. Оросын төлөөлөгчдийг өмнөх удаагийнх шиг Путины туслах Владимир Мединский, Украины төлөөлөгчдийг Гадаад тагнуулын албаны дарга Рустем Умеров ахалж байна. Зеленский эхний өдрийн гурван талт уулзалтыг бүтээлч байсан гэж үнэлсэн юм.