Nvidia-гийн түр гүйцэтгэх захирал Колетт Кресс ажилтнууддаа захидал илгээжээ

Үүсгэн байгуулагч Женсен Хуан Nvidia-гийн гүйцэтгэх захирлын албан тушаалаас огцорсны дараа шинэ түр гүйцэтгэх захирал Колетт Кресс, ТУЗ-ийн дарга Харви Жонс нар пүрэв гарагт ажилтнууддаа талархал, ирээдүйд итгэх итгэлээ илэрхийлсэн захидал илгээжээ.

CNBC захидлын хуулбарыг эх сурвалжаас олж авчээ. Тэрхүү эх сурвалжийн хэлснээр, эхлээд Жонс захидал илгээж, удалгүй Кресс хариу бичсэн байна.

“ТУЗ, удирдах ажилтнууд бид энэ үе онцгой хүнд байсныг ойлгож байгаа бөгөөд та бүхний тэсвэр тэвчээр, мэргэжлийн ур чадвар, тууштай байдалд ямар их талархаж байгаагаа хэлэхийг хүсэж байна” гэж Кресс бичжээ. Захидалд дурдсанаар, Nvidia арваннэгдүгээр сарын 18-ны Номхон далайн цагаар 9 цагт нийт ажилтны хурал хийнэ.

Кресс компани болон ирээдүйд нь гүнээ итгэдгээ бичжээ. Тэрбээр юуны түрүүнд ажилтнууд, харилцагч, түншүүддээ, мөн компанийн дэлхийн эдийн засагт гүйцэтгэж буй чухал үүрэгт итгэдэг аж.

Хиймэл оюун ухааны хувьсгалыг хөдөлгөж буй технологийг бүтээхэд компани гол үүрэг гүйцэтгэж байгаа бөгөөд түүнийг чухал ажил хүлээж байгааг тэрбээр дурдаад, хамтдаа урагшлахыг уриалжээ.

ТУЗ-ийн дарга Жонс захидалдаа Женсен гүйцэтгэх захирлын албан тушаал болон ТУЗ-ийн гишүүнээс огцорсныг мэдэгдээд, ТУЗ байнгын залгамжлагчийг дотоод болон гаднаас хайх хугацаанд санхүүгийн захирал Колетт Крессээс түр гүйцэтгэх захирлаар ажиллахыг хүссэнээ бичжээ. Жонс өөрөө компанийн түүхэн дэх ТУЗ-ийн анхны дарга болох юм.

“Санхүүгийн захирлаар 13 гаруй жил ажилласан Колетт NVIDIA-гийн өсөлт, хөрөнгийн стратегийн гол архитекторуудын нэг байсан. ТУЗ хувьцаа эзэмшигчид, харилцагчид, түншүүд болон та бүхний өмнө хүлээсэн амлалтаа Колетт биелүүлнэ гэдэгт бүрэн итгэж байна” гэж Жонс бичжээ.

Женсений NVIDIA-д оруулсан хувь нэмэр асар их бөгөөд компани хурдасгасан тооцооллыг анхлан нэвтрүүлж, хиймэл оюун ухааныг хөдөлгөсөн платформыг бүтээсэн гэж Жонс дурдаад, Крессийн удирдлага дор компани өсөлтөө үргэлжлүүлнэ гэдэгт итгэлтэй байгаагаа илэрхийлжээ.