Өмгөөлөгч: Эмпайр Стэйт Билдинг дээр авирсан Оросын хос албадан гаргагдах эрсдэлтэй байна

Нью-Йорк хотын Эмпайр Стэйт Билдинг тэнгэр баганадсан барилгын орой руу авирсан Оросын хоёр иргэн гэм буруугаа хүлээх тохиролцоо бүтэлгүйтсэний дараа албадан гаргагдах, хорих ял авах эрсдэлтэй байна гэж тэдний өмгөөлөгч мэдэгджээ.

33 настай Анжела Николау, 32 настай Иван Кузнецов нар долдугаар сард уг барилгад авирч, “Хайрын хүч эрх мэдлийн хайрыг ялах үед дэлхий энх тайвныг мэднэ” гэсэн бичигтэй хар туг мандуулжээ. Үүний дараахан Кузнецов Николаугаас гар гуйсан бөгөөд энэ бүхнийг камерт буулгасан нь олны анхаарлыг татсан юм.

Хосыг нэгдүгээр зэргийн хайхрамжгүйгээр аюул учруулах, хоёрдугаар зэргийн эд хөрөнгө гэмтээх, гуравдугаар зэргийн хууль бусаар нэвтэрсэн хүнд гэмт хэрэг, мөн хууль бусаар авирсан хөнгөн гэмт хэргээр яллагдагчаар татжээ. Тэд Пүрэв гарагт ээлжит шүүх хуралд оролцов.

“Бид ямар ч эд хөрөнгө гэмтээгээгүй. Хэнийг ч аюулд оруулах санаа байгаагүй” гэж Кузнецов шүүхийн байрны гадаа сэтгүүлчдэд хэлжээ.

“Бид зүгээр л хайрын захиас илгээхийг хүссэн. Өөрсдийгөө хамгаалахад бэлэн байна” гэж тэрбээр нэмж хэлэв. Түүний гарыг атгаж зогссон сүйт бүсгүй Николау шүүхийн гадаа уйлжээ.

Хосын өмгөөлөгч Ноам Биалегийн хэлснээр, прокурор хөнгөн гэмт хэргийн зүйл ангиар гэм буруугаа хүлээвэл цагаачлалын “сүйрлийн үр дагавраас” хамгаалагдана гэсэн санал тавьж, хос үүнийг хүлээн авсан байна. Гэвч Пүрэв гарагийн шүүх хуралдааны өмнөх орой энэ саналыг буцаан татсан гэж өмгөөлөгч хэлжээ.

“Орос руу буцаагдвал ноён Кузнецовыг Украины дайнд илгээх нь бараг гарцаагүй, хатагтай Николау уран бүтээлийн илэрхийллийнхээ төлөө шоронд хоригдож магадгүй” гэж Биале хэлэв.

“Шүүх дээр хэлсэнчлэн ямар нэг саналыг буцаан татсан гэх нь үнэн биш. Тэднийг яллаж буй зүйл ангиуд хэвээрээ байна” гэж Манхэттэн дүүргийн прокурорын газрын хэвлэлийн төлөөлөгч мэдэгдэлдээ дурджээ.