Өмнөд Австралид уугуул иргэдийн эзэмшлийн одон орны ажиглалтын газар нээгдлээ

Өмнөд Австралийн алслагдсан нутагт орших Кунибба уугуул нийгэмлэг пуужин хөөргөх Southern Launch компанитай хамтран одон орны ажиглалтын газрыг эзэмшиж, ажиллуулж байна.

Кунибба ажиглалтын газар жуулчдад уугуул иргэдийн одон орон судлалын талаар илүү ихийг мэдэх боломж олгох юм. Нийгэмлэгийн арав гаруй гишүүн гүн сансрын дурангаар ажиллах сургалтад хамрагдахаар бүртгүүлжээ.

Жералдин Уэр Кунибба нийгэмлэгт өсөхдөө одод ажиглаж, ард түмнийхээ тэнгэрт шингэсэн эртний домгийг ахмадуудаас сонсдог байжээ. Одоо түүний нийгэмлэг тэдгээр домгийг ярихад туслах ажиглалтын газар нээлээ.

Кунибба туршилтын талбай Өмнөд Австралийн баруун эргийн Седуна хотоос баруун хойш 40 орчим километрт байрладаг бөгөөд үүнийг ажиглалтын газраас харж болно.

Уэр одоо Кунибба нийгэмлэгийн аборигенийн корпорацийн удирдах зөвлөлийн дарга. Шинэ байгууламж нийгэмлэгт ямар боломж нээхийг бодохоор сэтгэл хөөрч байна гэж тэрбээр хэлжээ.

“Бидэнд сургалтад хамрагдах 20 орчим хүн байгаа. Тэд үүнийгээ төгс эзэмшинэ гэж найдаж байна. Тэгээд ирээдүйд аялал жуулчлалаа эхлүүлж болно” гэж тэрбээр хэлэв.

Шинэ ажиглалтын газарт сунгахад 150 гаруй сантиметр урт Sky-Watcher Flextube 400P дуран суурилуулжээ.

Кунибба нийгэмлэг 140 орчим хүн амтай бөгөөд тэдний 96 гаруй хувь нь уугуул иргэд. Гэвч ажиглалтын газар тэнгэрт шингэсэн домог, уугуул эзэд болон шөнийн тэнгэрийн хоорондох ариун холбоог зөв илэрхийлж чадна гэдэгт нийгэмлэгийн бүх хүн итгэлтэй биш байна.

“Дэлхийгээс одсон түүхүүд тэнгэрт амьдарсаар байдаг… Би ач, гуч нартаа оддоор гэрийнхээ замыг олохыг заадаг” гэж Гугата үндэстний ахмад Сью Хаселдин хэлжээ.

Хөтөч нар уугуул иргэдийн одон орон судлалын соёлын гүн утгыг хүлээн зөвшөөрөхийн оронд жуулчдад хэт хялбарчилж тайлбарлах вий гэж тэрбээр санаа зовж байна. “Тэд зөв түүхийг ярьж байна уу, эсвэл зүгээр л жуулчдыг баярлуулах гэж ямар нэг юм хийж байна уу?” гэж Сью эгч асуув.

Байгууламжийг барихад 1 сая гаруй австрали доллар зарцуулсан бөгөөд энэ нь жуулчдыг татах зорилготой гэж Southern Launch компанийн гүйцэтгэх захирал Ллойд Дамп хэлжээ. Мөн байгууламжаас тус компани 2020 оны есдүгээр сараас хойш арилжааны пуужин хөөргөж буй зэргэлдээх Кунибба туршилтын талбайг харах боломжтой гэж тэрбээр нэмжээ.

“Пуужин хөөргөлт, хиймэл дагуулын эргэн ирэлтийг үзэхээр ирэх зочид олшрохын хэрээр байгууламж нийгэмлэгийг дэмжинэ” гэж Дамп хэлсэн байна.

“Бид ажлын байр бий болгож, бүс нутагтаа аялал жуулчлал, хөрөнгө оруулалтыг өсгөж, залуучууддаа газар нутагтайгаа холбоогоо хадгалахын зэрэгцээ шинжлэх ухаан, технологи, сансрын талаар суралцах боломж олгохыг хүсч байна” гэж нийгэмлэгийн аборигенийн корпорацийн гүйцэтгэх захирал Кори Макленнан хэлэв.

Кунибба нь сансраас капсулыг тогтмол хүлээн авдаг дэлхийн цорын ганц газар тул “зөвхөн Австралид биш, дэлхийд тэргүүлж байна” гэж Австралийн сансрын агентлагийн дарга Энрико Палермо хэлжээ. Хамгийн сүүлд энэ сарын эхээр Varda Space Industries компанийн W-8 капсул амжилттай эргэн иржээ.