Өмнөд Солонгос, Индонез батлан хамгаалах үйлдвэрлэлийн хамтын ажиллагаагаа төрөлжүүлэх талаар хэлэлцжээ

Өмнөд Солонгос, Индонез батлан хамгаалах хэрэгслийг хамтран хөгжүүлэх, гуравдагч зах зээлд хамтран экспортлох зэргээр хамтын ажиллагаагаа төрөлжүүлэх талаар Лхагва гарагт хэлэлцсэнийг Сөүлийн Зэвсэглэл худалдан авах хөтөлбөрийн газар мэдэгджээ. Энэ тухай Ёнхап агентлаг мэдээлэв.

Жакартад болсон хоёр талын ээлжит уулзалтыг тус газар, Индонезийн Батлан хамгаалах яамны албаны хүмүүс удирджээ. Талууд хамтарсан хөгжүүлэлт, орон нутагт үйлдвэрлэх, хамтран экспортлох зэрэг компаниудын түншлэлийн загварыг төрөлжүүлэх арга замыг хэлэлцэж, хэрэгжиж буй томоохон төслүүдийн явцыг хянасан байна.

“Индонез бол зөвхөн цэргийн техник худалдан авагч бус, хамтарсан судалгаа, хөгжүүлэлтээс эхлээд үйлдвэрлэл хүртэлх стратегийн түнш хэвээр байгааг бид дахин баталлаа” гэж тус газар мэдэгджээ.

Өмнөд Солонгос Индонезтэй хамтран КФ-21 сөнөөгч онгоцоо бүтээж байгаа юм. Гэрээгээр Индонез хөгжүүлэлтийн зардлын нэг хэсгийг хуваалцаж, оронд нь технологи авах ёстой.

Гэвч Жакарта санхүүгийн оролцоогоо бууруулж, оронд нь бага технологи авахыг хүссэнээр төсөл саатаж байжээ. Талууд өнгөрсөн жил Индонезийн хөрөнгө оруулалтыг анхны амлалтын гуравны нэг орчим буюу 600 тэрбум вон (448.3 сая ам.доллар) болгон бууруулахаар тохиролцсон байна.

Цаашид тус газар хоёр орны батлан хамгаалах үйлдвэрлэлийн солилцоог дэмжих төр, хувийн хэвшлийн ээлжит зөвлөлдөх механизм байгуулахаар төлөвлөж байна. Уулзалтын дараа салбарын албаныхан хамтарсан төслийн боломжийг судлах бизнес уулзалт хийсэн юм.