Өмнөд Солонгос хууль бусаар ажиллаж буй гадаадын хүргэлтийн жолооч нарт хяналтаа чангатгаж байна

Өмнөд Солонгосын засгийн газар хууль бусаар ажиллаж буй гадаадын хүргэлтийн жолооч нар болон тэднийг нэвтрүүлж буй хүргэлтийн компаниудын тогтолцоонд тавих хяналтыг чангатгаж байна гэж Кориа Таймс сонин мэдээлжээ.

Хууль зүйн яам өнгөрсөн долоо хоногт Газар, дэд бүтэц, тээврийн яам, Хөдөлмөр эрхлэлтийн яам, Цагдаагийн ерөнхий газар, Эргийн хамгаалалттай хамтарсан арга хэмжээ авах талаар зөвлөлдсөн байна. Яам цагдаатай хамтарсан шалгалтаа эрчимжүүлж, хүргэлтийн агентлагуудын зохион байгуулалттай хууль бус ажилд авалт, зуучлал, үнэмлэхгүй жолоодлого, бусдын нэр дээрх бүртгэлийг зөвшөөрөлгүй ашиглах зэрэг гэмт хэргийг мөрдөхөөр төлөвлөжээ.

Шилжилт хөдөлгөөний алба хүргэлт зэрэг хориглосон салбарт хууль бусаар ажиллаж байгаад баригдсан гадаад оюутнуудад хэдэн удаа баригдсанаас үл хамааран зарчмын хувьд албадан гаргах эсвэл гарах тушаал өгнө. Улс даяарх шилжилт хөдөлгөөний газрууд аюулгүй байдлын эрсдэлтэй 69 бүс, ажлын байранд шалгалт хийхээр төлөвлөж байна.

Ардчилсан намын гишүүн Ким Ги Пёгийн парламентын шалгалтын үеэр танилцуулсан мэдээллээр энэ оны нэгдүгээр сараас наймдугаар сарын хооронд хүргэлтийн салбарт хууль бусаар ажиллаж байгаад 1,132 гадаадын иргэн баригдсан нь өнгөрсөн оны нийт 67-оос 16.9 дахин их юм.

Зөвхөн F-2 оршин суух, F-5 байнгын оршин суух, F-6 гэрлэлтийн цагаачлалын виз зэрэг тодорхой визтэй гадаадын иргэд хүргэлтийн жолоочоор ажиллах эрхтэй бөгөөд оюутны визтэй хүмүүс цагийн ажлын зөвшөөрөлтэй байсан ч ажиллах эрхгүй.

Шалгалтын үеэр тус улсын хамгийн том хүргэлтийн платформ Бэмин бүртгэл, түнш компаниудаа хянах хариуцлагын талаар шүүмжлэлд өртжээ.