Өмнөд Солонгосын элчин сайд Аляскийн байгалийн хийн төсөлд болзолтойгоор оролцох байр сууриа дахин илэрхийлжээ

Өмнөд Солонгосоос АНУ-д суугаа элчин сайд Кан Гён Хва 11 дүгээр сарын 11-нд Аляскийн шингэрүүлсэн байгалийн хийн төсөлд хамтран ажиллах хүсэлтэй байгаагаа дахин илэрхийлж, төсөлд оролцоход тавих арилжааны болон хууль эрх зүйн нөхцөлийг онцолжээ гэж Ёнхап агентлаг мэдээлэв.

Элчин сайд Вашингтон Пост сонинд бичсэн нийтлэлдээ Өмнөд Солонгос АНУ-д оруулахаар амласан 350 тэрбум ам.долларын хөрөнгө оруулалтын явцыг танилцуулжээ.

“Солонгос, АНУ арилжааны үндэслэлтэй байдал болон холбогдох дотоодын хуулийн шаардлагыг хангах нөхцөлтэйгөөр Аляскийн шингэрүүлсэн байгалийн хийн төсөл дээр ажиллаж эхлэхээр тохиролцсон” гэж Кан бичжээ.

Цагаан ордон өмнө нь 54 тэрбум ам.доллар нь Аляскийн төсөлд холбогдоно гэж мэдэгдэж байсан бол Сөүл оролцох эсэх нь төсөл арилжааны хувьд ашигтай эсэх дүгнэлтээс хамаарна гэсэн байр сууриа хадгалсаар ирсэн юм.

Кан Аляскийн төсөлд оруулах хөрөнгийн хэмжээг тодруулаагүй ч хоёр улсын засгийн газар АНУ-д найман том цөмийн реактор барихад Солонгосоос 120 тэрбум ам.доллар хүртэлх хөрөнгө оруулахаар тохиролцсоныг дурджээ.

Мөн хамтын ажиллагаа дэвшилтэт технологи болон бусад стратегийн салбарт өргөжихийн хэрээр харилцан итгэлцэж, амласнаа биелүүлэх нь чухал гэдгийг тэрбээр онцолжээ.

Ерөнхийлөгч Дональд Трамп өнгөрсөн сард Өмнөд Солонгос Аляскийн төсөлд хөрөнгө оруулахыг зөвшөөрөхгүй бол тус улсад илүү их төлбөр ногдуулна гэж сүрдүүлж байсан юм.