Өмнөд Солонгосын парламент хуурамч ял тулгалт гэх хэргийг шалгах тусгай прокурорын хуулийг баталжээ

Өмнөд Солонгосын эрх баригч Ардчилсан нам тэргүүлсэн Үндэсний ассамблей Ерөнхийлөгч Ли Жэ Мён болон бусад хүмүүсийн эсрэг хуурамч яллах дүгнэлт үйлдсэн гэх хэргийг тусгай прокуророор шалгуулах хуулийг Баасан гарагт баталсныг Кореа Таймс сонин мэдээлжээ.

Сөрөг хүчний Ардын хүч намын филибастер дууссаны дараа хуулийг 167 саналаар, 1-ийн эсрэг баталжээ. Ардын хүч намын гишүүд санал хураалтыг бойкотлосон байна.

Хууль нь өмнөх Ерөнхийлөгч Юн Сок Ёлын үеийн прокурорын газар тухайн үед сөрөг хүчний удирдагч байсан Ли Жэ Мён болон бусдын эсрэг хэрэг үүсгэхдээ нотлох баримт зохиож, хуурамч мэдүүлэг өгүүлсэн гэх асуудлыг хараат бус прокуророор шалгуулах юм.

«Энэ бол ерөнхийлөгч л бол хүний гэмт хэргийг алга болгох боломж олгох хууль» гэж Ардын хүч намын дарга Жан Дон Хёк хэлжээ.

Тусгай прокурор 12 хэргийн яллах дүгнэлтийг шалгах бөгөөд үүний зургаа нь Ли Жэ Мёны Сонам хотын дарга, Кёнгидо мужийн захирагч байх үеийн хэргүүд юм. Ли Жэ Мён өнгөрсөн оны 6 дугаар сард албан тушаалд орсноос хойш Үндсэн хуулийн 84 дүгээр зүйлийн дагуу түүний шүүх хурал түр зогссон байна.

Ардчилсан нам анх тусгай прокурорт яллах дүгнэлтийг цуцлах эрх олгох заалт оруулахыг хүсэж байсан ч нам доторх болон гаднах эсэргүүцлийн улмаас эцсийн хувилбараас хассан юм.