Онгоц барьцаалахаар заналхийлсэн гэх хууль бус цагаачийг баривчлах үеийн аврах албаныхны радио ярианы бичлэг ил болжээ

АНУ-д хууль бусаар байсан цагаач онгоцыг барьцаалахаар заналхийлж, үүргэвчиндээ “тэсрэх бөмбөг байгаа” гэсэн гэх хэрэг дээр аврах албаныхан хэрхэн ажилласныг харуулсан аюулгүй байдлын шинэ дуу бичлэг ил болжээ гэж Фокс Ньюс телевиз мэдээлэв.

Юнайтед Эйрлайнсийн 2174 дугаар нислэг Даваа гарагийн орой Нью-Жерси мужийн Ньюарк хотоос Нью-Орлеанс руу нисэж явахад нисгэгчид түгшүүрийн дохио өгчээ. Энэ үйл явдлын үеэр хэн ч гэмтээгүй байна.

Гондурасын 34 настай сэжигтэн Рони Гомез-Альберто баривчлагдаад одоо хоригдож байна. Сэжигтнийг өмнө нь АНУ-аас хоёр удаа албадан гаргаж байсан бөгөөд тэрбээр Калифорниар дахин хууль бусаар нэвтэрсэн гэж Дотоодын аюулгүй байдлын яам Фокс Ньюст баталжээ. Шүүгч түүнийг 2020 онд суллаж байжээ.

Орон нутгийн телевизийн олж авсан бичлэгээс үзэхэд, зорчигчдыг онгоцноос буулгаж байх үед сэжигтнийг онгоцны арын хэсэгт барьж байсан бололтой.

Радио ярианд “Бид түүнийг арын хаалганы дэргэд барьж байна. Арын хаалгыг тэр эвдэж нээсэн” гэх нь сонсогдоно. Мөн нисгэгчид бүхээгтээ хаалгаа түгжин үлдэж, онгоцны үйлчлэгчдийг онгоцноос буулгана гэх яриа бичлэгт сонсогдоно. Сэжигтэн англиар ярьдаггүй гэдгийг ч бичлэгт дурдсан байна.

Радио ярианд ямар байгууллагууд оролцсон нь тодорхойгүй байна.

Сэжигтнийг Жефферсон Пэриш тойргийн шерифийн ажилтнууд баривчилжээ. Тэрбээр айлган сүрдүүлэх, төлөвлөсөн галдан шатаалтын тухай худал мэдээлэл тараах, шүүхээс оргон зайлах хэрэгт буруутгагдан батлан даалтгүйгээр хоригдож байна.