Ормузын хоолойд хоёр танкер, нэг чирэгч хөлөг галд автсан гэж Иран мэдээлжээ

Ормузын хоолойг гатлах гэж оролдсон хоёр газрын тосны танкер, нэг чирэгч хөлөг галд автсан гэж Ираны Хувьсгалт харуулын хүчин мэдэгджээ. Энэ тухай РИА Новости агентлаг Ираны Пресс Ти Ви телевизийг иш татан мэдээлэв.

Телевизийн мэдээлснээр танкерын нэг нь минад дэлбэрсэн бол нөгөөгийнх нь галын шалтгаан тодорхойгүй байна. Чирэгч хөлөг гал унтраахад туслахаар хоёр дахь танкерт ойртсоны дараа шатжээ.

Хувьсгалт харуулын тэнгисийн цэргийн хүчин цахим дайны хэрэгслээр ЛУКАС төрлийн хоёр нисгэгчгүй онгоцны удирдлагыг таслан авч, газардуулан хураасан гэж телевиз нэмж дурджээ.

АНУ, Израиль 2 дугаар сарын 28-нд Иран руу цохилт өгч эхэлсэн бөгөөд Иран хариу цохилт өгсөн юм. Мөргөлдөөн одоогоор намжсан ч шийдэгдээгүй хэвээр, дахин дэгдэх эрсдэлтэй аж.

Хоолойг нээх хувилбар бүхий долоон нөхцөлтэй төлөвлөгөөг далайн бүслэлт, нефтийн экспортын хязгаарлалтыг цуцлахын хариуд АНУ-д санал болгосон гэж Тегеран өмнө нь мэдэгдсэн. Ерөнхийлөгч Дональд Трамп энэ саналаас татгалзжээ.