Оросын боловсролын бүрэн эрхт нейрон сүлжээг хичээлийн жилийн эцэс гэхэд танилцуулж магадгүй

Боловсролын салбарт зориулсан дэлхийн анхны бүрэн эрхт нейрон сүлжээг хичээлийн жилийн эцэс гэхэд танилцуулж магадгүй гэж ОХУ-ын Гэгээрлийн сайд Сергей Кравцов мэдэгджээ. Энэ тухай Ведомости сонин ТАСС агентлагийг иш татан мэдээлэв.

“Энэ бол дэлхийд байхгүй өвөрмөц бүтээл юм” гэж Кравцов хэлжээ. Түүний хэлснээр, хүүхдэд аюулгүй, хамгаалагдсан энэ сүлжээнд шалгагдсан, үнэн зөв мэдээлэл багтах бөгөөд яам үүнийг сургалтын үйл ажиллагаанд ашиглахыг зөвлөх юм.

Эрдэмтдийн баг бүтээж байгаа уг сүлжээг нэвтрүүлэх шийдвэр гаргахаас өмнө туршина гэж сайд онцолжээ.

ОХУ-ын Ерөнхийлөгчийн зөвлөх Елена Ямпольская 10 дугаар сарын 9-нд боловсролын нэгдсэн нейрон сүлжээ бий болгохыг дэмжиж, эцсийн зорилго нь багш нарын ажлыг хөнгөвчилж, хүүхдүүдтэй бүтээлчээр ажиллах цаг гаргах явдал гэж хэлсэн юм.

Кравцов 10 дугаар сарын 5-нд Ерөнхийлөгч Владимир Путины дэмжсэн нэгэн багшийн саналын хариуд яам бүх эрсдэлийг харгалзан боловсролын тусгай нейрон сүлжээ бүтээнэ гэж мэдэгдэж байжээ.