Оросын иргэдэд виз нэвтрүүлсэн нь эдийн засгийн амиа хорлолт гэж Монтенегрогийн улстөрч мэдэгдэв

Монтенегрогийн эрх баригчид Оросын иргэдэд арваннэгдүгээр сарын 1-нээс виз нэвтрүүлсэн нь эдийн засгийн амиа хорлолт гэж тус улсын Ардчилсан ардын намын дарга Милан Кнежевич РИА Новости агентлагт мэдэгджээ.

Монтенегрогийн засгийн газар долоодугаар сарын 23-нд визийн дэглэмийн тогтоолд өөрчлөлт оруулах шийдвэр гаргасан бөгөөд арваннэгдүгээр сарын 1-нээс Орос, Беларусь, Туркийн иргэд тус улсад нэвтрэхдээ виз авах шаардлагатай болсон байна.

Кнежевичийн хэлснээр Орос, АНУ-ын ерөнхийлөгчид Украин дахь зэвсэгт мөргөлдөөнийг зогсоохыг эрмэлзэж буй энэ үед Монтенегро орос эсэргүү бодлогоо үргэлжлүүлэхээр шийдсэн бөгөөд үүнээс Орос бус, харин уг бодлогыг хэрэгжүүлэгчид хохирох юм.

Тэрбээр виз нэвтрүүлсэн нь аялал жуулчлалын улирал болон дотоодын нийт бүтээгдэхүүнийг эрсдэлд оруулж байгааг онцолсон. «Орос ч мөн адил хариу арга хэмжээ авч, Монтенегрогийн иргэдэд виз нэвтрүүлнэ» гэж Кнежевич хэлжээ.

Статистикийн газрын мэдээллээр Оросын иргэд 2025 онд Монтенегрод 203 мянга удаа нэвтэрсэн нь гадаадын иргэдийн нийт нэвтрэлтийн 8 хувь болж, 2 сая 144 мянга 519 хоног буудалласан нь гадаадынхны нийт буудалласан хоногийн 16.4 хувийг эзэлжээ.

Москва дахь ОХУ-ын Элчин сайдын яам долоодугаар сард Монтенегро виз нэвтрүүлж байгаа нь Подгорица гадаадын ивээн тэтгэгчдээс хараат байгааг харуулж байна гэж мэдэгдэж байсан.

Монтенегрогийн визийг Москва, Санкт-Петербург, Архангельск, Мурманск зэрэг хотуудад байрлах визийн үйлчилгээний төвүүдээс болон Москва дахь Монтенегрогийн Элчин сайдын яамнаас авах боломжтой юм.