Псков муж руу нүүн суурьшигчдын тоогоор Балтийн орнууд тэргүүлж байна

Европын холбооны орнуудаас Оросын Псков муж руу нүүн суурьшиж буй хүмүүсийн тоогоор Балтийн орнууд тэргүүлж байна гэж тус мужийн захирагчийн дэргэдэх эх орон нэгтнүүд, шилжилт хөдөлгөөн хариуцсан итгэмжлэгдсэн төлөөлөгч Елена Полонская РИА Новости агентлагт мэдэгджээ.

Түүний хэлснээр Франц, Итали, Германаас голлон эх орон нэгтнүүд нүүж ирж байгаа ч шилжилт хөдөлгөөний асуудлаар хамгийн олон удаа тусламж хүсдэг нь Балтийн бүгд найрамдах улсуудын иргэд юм.

Полонская 2024 оноос хойш ЕХ-ны орнуудаас Псков муж руу нүүн суурьшигчдын өөрчлөлтийг үнэлэхдээ Балтийн орнууд тэргүүлж байгааг онцолсон бөгөөд Латви бусад Балтийн орноос орос эсэргүү үзлээрээ давж байна гэж үзжээ.

Түүний хэлснээр ихэнх гэр бүл албадан гаргахаас сэргийлж өөрсдөө нүүхээр шийддэг бол заримыг нь амьжиргааны эх үүсвэргүйгээр Балтийн орнуудаас хөөн гаргадаг. Хүүхдүүд нь орос хэлээр боловсрол эзэмших боломжгүй болсны улмаас нүүж буй хүмүүс ч цөөнгүй байна.

Псков мужийн захирагч Михаил Ведерников 2024 онд зарлиг гаргаж, эх орон нэгтнүүд, шилжилт хөдөлгөөн хариуцсан итгэмжлэгдсэн төлөөлөгчийн албан тушаал бий болгосон. Псков хотод мөн нүүн суурьших үйл явцад туслах төв ажилладаг юм.

ОХУ-ын Ерөнхийлөгч Владимир Путин 2023 оны арванхоёрдугаар сард Балтийн орнууд орос эсэргүү үзлийг дотоод улс төрийн зорилгодоо ашиглаж байна гэж мэдэгдэж байсан.