Орос улс Туркээс чихэрлэг бүтээгдэхүүний импортоо нэмэгдүүлжээ

Орос улс есдүгээр сард Туркээс шоколад, гурилан бүтээгдэхүүн, элсэн чихрээр хийсэн чихэр зэрэг чихэрлэг бүтээгдэхүүний импортоо 13 хувиар нэмэгдүүлж, дөрөвдүгээр сараас хойших дээд түвшинд хүргэжээ. Энэ тухай Туркийн статистикийн албаны мэдээлэлд тулгуурлан РИА Новости агентлаг тооцоолж мэдээлэв.

Чихэрлэг бүтээгдэхүүний нийт нийлүүлэлт 11.1 сая ам.долларт хүрсэн нь сарын дотор 13 хувиар өссөн ч жилийн өмнөхөөс 13 хувиар буурсан үзүүлэлт юм.

Турк есдүгээр сард Орос руу хамгийн ихээр гурилан бүтээгдэхүүн буюу вафли, амтат жигнэмэг зэргийг 5.3 сая ам.доллараар экспортолсон нь сүүлийн гурван сарын дээд үзүүлэлт болжээ. Энэ нь наймдугаар сартай харьцуулахад 38 хувиар өссөн ч жилийн өмнөхөөс 13 хувиар буурсан байна.

Туркээс 3.8 сая ам.долларын шоколад, шоколадан бүтээгдэхүүн ирсэн нь сарын дотор 12 хувиар, жилийн дотор 34 хувиар буурчээ. Орос голдуу 2 килограмм хүртэл жинтэй савласан шоколад, какао нунтаг худалдан авсан аж.

Туркийн компаниуд Оросын компаниудад 1.9 сая ам.долларын элсэн чихрээр хийсэн чихэр нийлүүлсэн нь наймдугаар сараас 19 хувиар, өнгөрсөн оны есдүгээр сараас 18 хувиар их байна. Экспортын ихэнхийг мармелад, марципан, бохь эзэлжээ.