Нижний Новгород мужид нисгэгчгүй онгоцны халдлагын улмаас аж үйлдвэрийн байгууламж эвдэрчээ

Оросын Нижний Новгород мужийн дээгүүр шөнө болон өглөө зуу гаруй нисгэгчгүй онгоц устгасан бөгөөд нэгэн аж үйлдвэрийн байгууламж ихээхэн эвдэрсэн гэж мужийн захирагч Глеб Никитин мэдэгдсэн тухай РИА Новости агентлаг мэдээлэв.

Никитин Телеграм сувагтаа нисгэгчгүй онгоцны их хэмжээний халдлагын үеэр Кстово дүүргийн аж үйлдвэрийн байгууламж ихээхэн эвдэрсэн гэж бичжээ.

Түүний хэлснээр урьдчилсан мэдээллээр хохирогч байхгүй бөгөөд иргэний дэд бүтэц, эд хөрөнгөд учирсан хохирлыг үнэлж байна.

Халдлагын үр дагаврыг арилгахад шаардлагатай бүх хүч хэрэгслийг дайчилж, онцгой байдлын албаныхан газар дээр нь ажиллаж байгаа аж.

Захирагчийн хэлснээр сэргээн босгох ажлын үеэр орон сууцыг хангадаг зарим шугам сүлжээнд цахилгаан түр тасарч, халуун ус, халаалтын үзүүлэлт буурч болзошгүй. Эд хөрөнгө нь хохирсон иргэдэд тусламж үзүүлэх юм.