Оросын хиймэл оюуны загварууд уламжлалт үнэт зүйлсэд нийцэх ёстой болно

Орост хиймэл оюуны загвар бүтээгчид 2027 оны гуравдугаар сарын 1-нээс эхлэн загвар нь Оросын хууль тогтоомж, уламжлалт оюун санаа, ёс суртахууны үнэт зүйлсэд нийцэж буйг баталгаажуулах ёстой болно гэж Төрийн думын Дижитал хөгжил, хиймэл оюуны хорооны тэргүүлэх орлогч дарга Антон Немкин мэдэгджээ. Энэ тухай РИА Новости агентлаг мэдээлэв.

“Энэ нь Орост хиймэл оюуныг хөгжүүлэхэд зөвхөн техникийн шалгалт бус, хууль тогтоомжид тусгагдсан хууль эрх зүйн хэм хэмжээ, үнэт зүйлийн чиг баримжаанд нийцэж буйг үнэлэх шаардлагатай гэсэн үг” гэж Немкин хэлжээ.

Түүний үзэж буйгаар, шинэ шаардлага тунхаглал төдий үлдэх ёсгүй бөгөөд шалгах дүрэм зах зээлийн бүх оролцогчдод тодорхой, ил тод, нэгэн жигд байх ёстой. Хуулийг дагаж мөрдөх нь албан ёсны хандлагаас эсвэл хөгжүүлэгчдийн ашиг сонирхлоос хамаарч болохгүй гэж тэр онцолжээ.

Засгийн газар нийцлийг баталгаажуулах журам тогтоох тул тодорхой шалгуур, журам, зөрчлийн хариуцлагыг тусгах нь чухал гэж Немкин үзэж байна. Хөгжүүлэгчид загварт ямар шаардлага тавигдах, ямар материал, туршилтын үр дүн гаргах, хяналтыг хэрхэн зохион байгуулахыг урьдчилан мэдэх ёстой аж.

Немкины хэлснээр, Орост боловсрол, эрүүл мэнд, аж үйлдвэр, төрийн удирдлагад үр дүнтэй ажиллах өрсөлдөх чадвартай хиймэл оюуны загварууд хэрэгтэй бөгөөд төрийн үүрэг бол технологийн хөгжил, хуулийн хэрэгжилт, олон нийтийн ашиг сонирхлын тэнцвэрийг хангах явдал юм.