Оросын Төрийн Дум тамхи, вейпийн найрлагыг ил болгох хууль баталжээ

ОХУ-ын Төрийн Думын депутатууд вейп, тамхи болон бусад никотинтой бүтээгдэхүүн үйлдвэрлэгчдийг найрлагаа ил болгохыг үүрэгжүүлсэн хуулийн төслийг хоёр, гурав дахь буюу эцсийн хэлэлцүүлгээр баталжээ. Энэ тухай Ведомости сонин мэдээлэв.

Хуулиар Худалдааны нууцын тухай хуульд өөрчлөлт оруулах юм. Төрийн Думын дарга Вячеслав Володины хэлснээр, одоогоор тамхи, вейпийн найрлагын мэдээллийг худалдааны нууцад тооцдог аж.

“Тамхи, вейп, цахим тамхинд давирхай, металл болон бусад химийн бодис, хортой нэгдлүүд агуулагддаг” гэж Володин хэлжээ. Тэрбээр сүүлийн нэг жилд эмч нар амьсгалын эрхтний гэмтэлтэй өвчтөний тоо 30 хувиар өссөнийг бүртгэсэн бөгөөд ихэвчлэн өсвөр насныхан, 35-аас доош насны залуучууд өвчилж байгааг онцолсон байна.

Хууль 2027 оны 1 дүгээр сарын 1-нээс хүчин төгөлдөр болох төлөвтэй байна.

Санкт-Петербургийн хууль тогтоох хурал 11 дүгээр сарын 11-нд никотин хүргэх цахим систем, түүний шингэнийг жижиглэнгээр худалдахыг 2027 оны 3 дугаар сарын 1-нээс 2032 оны 3 дугаар сарын 1 хүртэл таван жил бүрэн хориглох хуулийн төслийг анхны хэлэлцүүлгээр баталжээ.