Оросын цохилтын улмаас Украинд олон мянган айл цахилгаангүй болсон гэж Зеленский мэдэгдэв

Оросын цохилт Украины эрчим хүчний дэд бүтцэд хүрч, олон айлыг цахилгаангүй болгосон гэж Украины Ерөнхийлөгч Володимир Зеленский ням гарагт мэдэгдсэн тухай Политико сайт мэдээлжээ.

Зеленскийн хэлснээр шөнө Днепр, Винница, Житомир, Хмельницкий гэсэн дөрвөн мужийн дэд станц, трансформатор, цахилгаан шугам цохилтод өртжээ.

«Одоогоор хэдэн зуун мянган гэр бүл цахилгаангүй хэвээр байна» гэж Зеленский нэмж хэлэв.

Үүний зэрэгцээ Оросын эрх баригчид Нижний Новгород мужийн аж үйлдвэрийн байгууламж руу их хэмжээний нисгэгчгүй онгоц халдсан гэж мэдээлсэн байна. Мужийн захирагч Глеб Никитин зуу гаруй нисгэгчгүй онгоц устгасан гэсэн бөгөөд аль байгууламж болохыг нэрлээгүй юм.

Уолл Стрит Жорнал сонины мэдээлснээр Киев АНУ-ын Ерөнхийлөгч Дональд Трампын шахалтаар Оросын газрын тос боловсруулах үйлдвэрүүд рүү цохилт өгөхөө арваннэгдүгээр сарын 3-ны завсрын сонгууль хүртэл түр зогсоохоор тохиролцсон байжээ.

Трамп аравдугаар сард эрчим хүчний гал зогсоолт зарлахад Украин 72 цагийн турш ийм цохилтоо зогсоосон ч Кремль Украины эрчим хүчний дэд бүтэц рүү буудсаар байсан юм.