Саудын Арабын Зүүн-Баруун газрын тосны хоолой дахин халдлагад өртжээ
Ормузын хоолойг тойрох энэ хоолойгоор одоо дэлхийн газрын тосны нийлүүлэлтийн 4 орчим хувийг тээвэрлэж байна.
Саудын Арабын Зүүн-Баруун газрын тосны чухал хоолой дахин халдлагад өртсөнийг төрийн хэвлэл мэдээлсэн гэж Аль Жазира телевиз бичжээ.
Саудын Эрчим хүчний яамны албан тушаалтны хэлснээр даваа гарагт Мэдина мужид хоолой руу халдлага үйлдэж, хязгаарлагдмал хэмжээний гал гарсныг унтраасан байна. Хүний амь эрсдээгүй, хоолойн үйл ажиллагаа хэвийн үргэлжилж байгаа аж.
Халдлагыг хэн үйлдсэнийг мэдээлээгүй ч Саудын Араб болон түүний дэмждэг Йемений засгийн газрын эвсэл, Ираны дэмжлэгтэй хуситуудын хооронд тулаан ширүүсч байна.
Хуситууд дрон, пуужингаар Саудын Арабын газрын тосны дэд бүтэц, тэр дундаа боловсруулах үйлдвэр, агуулахуудыг удаа дараа онилж ирсэн юм.
Арабын хойгийн цөлийг дайран өнгөрдөг 1200 километр урт хоолойг 9 дүгээр сард дроны халдлагын дараа хэд хоног зогсоосон бөгөөд Саудын Араб халдлагыг Иракаас хийсэн гэж мэдэгдэж байжээ.
Ормузын хоолойгоор газрын тос тээвэрлэх нь тасалдсанаас хойш Эр-Рияд өдөрт 4 сая орчим баррель түүхий тосыг энэ хоолойгоор Янбу боомт руу шилжүүлж байгаа нь дэлхийн нийлүүлэлтийн 4 орчим хувьтай тэнцэнэ.
