Шадаев: Эрх баригчид дата төвүүдийг газар доор байршуулахыг илүүд үзэж байна

Дата төвүүдийг ОХУ-ын нутаг дэвсгэрт, бүр газар доор байршуулах нь илүү зохимжтой гэж Цахим хөгжлийн сайд Максут Шадаев CNews Forum 2026 чуулган дээр мэдэгдлээ.

“Гадаад руу нүүх, газар доор орох гэсэн хоёр сонголтоос бид мэдээж [дата төвүүдийг] гадагш шилжүүлэхээс илүү газар доор оруулахыг сонирхож байна” гэж тэрбээр хэлсэн байна.

“Ростелеком” газар доорх дата төв барихаар болсон нь арваннэгдүгээр сарын эхээр тодорхой болсон. Ийм байгууламж хамгаалалтын гурван түвшинтэй тул хамгийн хамгаалалттайд тооцогддог гэж компанийн нэгэн удирдах ажилтан тайлбарлажээ.

Эхний түвшинд үндсэн дэд бүтэц гэмтвэл ашиглах зорилгоор өгөгдлийн хуулбарыг хадгалах нөөц талбай байгуулна. Хоёр дахь түвшинд тархсан архитектурт шилжиж, тооцоолох хүчин чадал, үйлчилгээг газар зүйн хувьд тусдаа хэд хэдэн талбайд байршуулна.

Гурав дахь түвшинд хамгийн ноцтой аюул заналын хувилбарыг тооцож, дата төвүүдийг газрын гүнд байршуулна.

ОХУ-ын Ерөнхийлөгч Владимир Путин арваннэгдүгээр сарын 2-нд зарлиг гаргаж, гадаадын дата төвүүдийн хүчин чадлыг түр хугацаанд ашиглахыг зөвшөөрсөн юм. Уг зарлигаар төрийн байгууллага, төрийн болон хотын өмчит аж ахуйн нэгж, байгууллагад хамааралгүй Оросын дата төвүүд талбай, хүчин чадлынхаа 10 хувийг нөөцөлж байхаар заажээ.