Төв банкны тэргүүн Набиуллина рублийн ханшийн одоогийн хэлбэлзлийг хэт их гэж үзэхгүй байна

Одоогийн нөхцөл байдлыг харгалзвал рублийн ханшийн хэлбэлзлийн хүрээ хэтэрхий өргөн биш гэж ОХУ-ын Төв банкны ерөнхийлөгч Эльвира Набиуллина Төрийн думд хэлсэн үгэндээ мэдэгдлээ.

Рублийн ханш бизнесийг үргэлж зовоодог гэдгийг Набиуллина дурдлаа. Эхэндээ рубль огцом сулрах вий хэмээн олон хүн болгоомжилж байсан бол өнгөрсөн жил экспортлогчид болон импорттой хүчтэй өрсөлддөг компаниуд эсрэгээрээ рубль хэт чангарсан гэж гомдоллож эхэлснийг тэрбээр сануулав.

Бизнес эрхлэгчид болон шинжээчид аль салбарыг төлөөлж байгаагаасаа шалтгаалж Төв банкийг аль нэг чиглэлд арга хэмжээ авахыг байнга уриалдаг гэж тэрбээр тайлбарлажээ. “Бид рублийн ханшийг сонгогдсон салбаруудын хэрэгцээ бус, экспорт-импортын урсгал, хадгаламжид рубль хэр татах чадвартай байгаагаар тодорхойлох ёстой гэсэн байр суурьтай. Эдийн засагт бүх салбар чухал. Зөвхөн ийм тохиолдолд валютын суваг эдийн засгийг бэхжүүлэх механизм болж ажилладаг” гэж тэр онцолжээ.

“Мэдээж, рубль илүү нарийн хүрээнд хэлбэлзээсэй гэж хүн бүр хүсэх байх. Гэхдээ бидний бүх нөхцөл байдал, бүх хоригийг харгалзвал одоогийн хэлбэлзлийн хүрээ хэтэрхий их гэж харагдахгүй байна” гэж Набиуллина тэмдэглэв.

Бусад нөхцөл ижил байхад инфляц бага байх тусам ханш тогтвортой байдаг нь ерөнхий зүй тогтол гэж тэрбээр тайлбарласан байна.

“Инфляцын 4 хувийн зорилтод ирэх жил хүрнэ гэж тооцоолж байна. Энэ бол бидний суурь таамаглал. Энэ нь эдийн засгийн өсөлт аажмаар хурдсаж, бодлогын хүүг тууштай боловч болгоомжтой бууруулахыг мөн тооцсон. Бодлогын хүү 2029 онд 7.5 хувиас 8.5 хувь хүртэлх саармаг түвшиндээ хүрнэ” гэж Төв банкны тэргүүн хэлсэн.

Үүний чухал нөхцөл бол 2027–2029 оны холбооны төсвийн хуулийн төсөлд тусгасан алдагдлыг аажмаар бууруулах явдал юм. “Энэ нь юуны өмнө санхүүгийн урт хугацааны тогтвортой байдлын хувьд чухал. Үүний үр дүнд үнийн өсөлтийг хурдасгах эрсдэлгүйгээр зээлийг нэмэгдүүлэх боломж нээгддэг” гэж Набиуллина хэлэв.