Шинжээч: Луйварчид СМС-ээр бөмбөгдөж, хохирогчийг сандаргадаг

Луйварчид Оросын иргэдийн эсрэг СМС-бөмбөгдөлт ашиглаж, хохирогчийг сандаргаж, сонор сэрэмжийг нь сулруулснаар санхүүгийн алдаа гаргах магадлалыг нэмэгдүүлдэг гэж Ардын фронтын Зээлдэгчдийн эрхийн төлөө төслийн дэд удирдагч Александра Пожарская арваннэгдүгээр сарын 15-нд РИА Новости агентлагт ярьжээ.

СМС-бөмбөгдөлт гэдэг нь хохирогчийн утас руу богино хугацаанд олон мессеж илгээдэг халдлагын нэг хэлбэр юм.

“СМС-бөмбөгдөлт бол хор хөнөөлгүй спам биш, халдлагын бүрэн хэмжээний бэлтгэл. Луйварчид зээл батлагдсан, данс хаагдсан, мөнгө хасагдсан, олон үйлчилгээнд бүртгүүлсэн эсвэл бүртгэлийг нь хакердсан гэх мэт хэдэн арван мессежээр хохирогчийг санаатайгаар бөмбөгддөг. Гол зорилго нь сандаргаж, шүүмжлэлт сэтгэлгээг сулруулах” гэж Мошеловка платформын шинжээч Пожарская хэлэв.

Ийм олон мессеж дунд хүн алдаа гаргах магадлал өндөр байдаг гэж тэрбээр тайлбарлав. “Холбоос дээр дарах, хортой аппликейшн суулгах, эсвэл бүр илүү аюултай нь тусламжийн төв, аюулгүй байдлын албаны ажилтан гэх хүмүүс залгахад СМС-ээр ирсэн кодыг хэлж өгөх” гэж Пожарская нэмжээ.

Мессежийн давалгааны дараа хэн нэгэн залгаж, мессежийг зогсооход тусална гэж санал болгодог хувилбар онцгой заль мэхтэй аж.

СМС-бөмбөгдөлтөд өртвөл юуны өмнө сандрахгүй, холбоос дээр дарахгүй, код, нууц үг, картын мэдээллээ хэлэхгүй байхыг Пожарская зөвлөж байна.

“Хамгийн сайн арга бол илгээгчдийн дугаарыг утасныхаа тохиргоогоор блоклох эсвэл операторын спам шүүх үйлчилгээг идэвхжүүлэх. Хэрэв мессежийн араас дуудлага ирвэл ярилцалгүй, шууд утсаа таслаарай” гэж тэрбээр хэлэв.