Үндсэн хуулийн шинэчлэл Ли Жэ Мёны хоёр дахь бүрэн эрхийн төлөө биш гэж Өмнөд Солонгосын парламентын дарга мэдэгдэв

Өмнөд Солонгосын Үндэсний ассамблейн дарга Жо Жон Сик Үндсэн хуулийн шинэчлэлийг үргэлжлүүлэн дэмжихээ Лхагва гарагт дахин илэрхийлж, энэ нь Ерөнхийлөгч Ли Жэ Мёнд дахин нэр дэвших боломж олгох зорилготой гэх сөрөг хүчний мэдэгдлийг няцаажээ. Энэ тухай Ёнхап агентлаг мэдээлэв.

“Үндсэн хуулийн 128 дугаар зүйлд заасны дагуу одоогийн ерөнхийлөгчийн бүрэн эрхийн хугацааг сунгах асуудал Үндсэн хуулийн шинэчлэлийн хэлэлцүүлгийн сэдэв биш” гэж Жо ахмад сэтгүүлчдийн Гуаньхун клубын хэлэлцүүлгийн үеэр хэлжээ.

Жо 7 дугаар сард хэвлэлийн бага хурлын үеэр одоогийн ерөнхийлөгч дахин нэр дэвших эсэхийг ард түмэн шийдэх ёстой гэж хэлсний дараа сөрөг хүчний хууль тогтоогчид түүнийг энэ боломжийг нээлттэй орхисон эсэхэд эргэлзэж байсан юм. Тэрбээр өмнөх үгээсээ үүдэлтэй маргааны төлөө олон нийтээс дахин уучлалт гуйжээ.

Жогийн хэлснээр, Үндсэн хуулийн шинэчлэлийг парламент тэргүүлэх ёстой бөгөөд шинэчлэлийн чиглэл, тэргүүлэх асуудлыг тодорхойлох зөвлөх хороог удахгүй өөрийн дэргэд байгуулах юм. Ирэх онд улсын хэмжээний сонгууль товлогдоогүй тул шинэчлэлийг тайван хэлэлцэхэд тохиромжтой цаг гэж тэрбээр үзжээ.

Жо мөн ирэх онд АНУ, Хятад зэрэг томоохон улсад айлчлахаар төлөвлөж буйгаа мэдэгдсэн байна.

Өмнөд Солонгосын Үндсэн хуулиар ерөнхийлөгч 5 жилийн ганц бүрэн эрхтэй бөгөөд бүрэн эрхийг сунгах нэмэлт өөрчлөлт нь түүнийг санал болгох үед ажиллаж буй ерөнхийлөгчид хамаарахгүй гэж заасан байдаг.