Узбекистан хүүхдийн сайн сайхан байдлын тогтоолын төслийг НҮБ-д өргөн барина гэж Саида Мирзиёева мэдэгдэв

Узбекистан Хүүхдийн сайн сайхан байдалд хөрөнгө оруулах тухай Самаркандын тунхаглалд үндэслэсэн тогтоолын төслийг НҮБ-ын Ерөнхий Ассамблейд өргөн барих бодолтой байгааг Ерөнхийлөгчийн тамгын газрын дарга Саида Мирзиёева 11 дүгээр сарын 10-нд Парисын энх тайвны форумын үеэр мэдэгджээ. Энэ тухай Газета.уз сайт мэдээлэв.

10 дугаар сарын 22-нд батлагдсан тунхаглалаар хүүхдийн эрүүл мэнд, боловсрол, нийгмийн хамгааллын төрийн хөрөнгө оруулалтыг аажмаар нэмэгдүүлэхээр заажээ. Узбекистан эдгээрт ДНБ-ий доод хувь хэмжээг тогтоож, эдийн засгийн уналтын үед ч энэ түвшнийг хадгалахыг орнуудад санал болгож байна.

“Энх тайвны үед барьсан сургууль, эмнэлэг дайнд хамгийн түрүүнд хохирдог” гэж Мирзиёева хэлээд, сургууль, эмнэлэг рүү халдсаны төлөө маш өндөр үнэ төлөх ёстой гэжээ.

Тэрбээр Узбекистан цахим орчинд хүүхдийг хамгаалах хууль тогтоомжоо чангатгаж, цахим дээрэлхэлт, залилангийн төлөө бодит шийтгэл тогтоосныг дурджээ. Мөн бусад орон 16-аас доош насны хүүхдийн олон нийтийн сүлжээнд хандахыг хэрхэн хязгаарлаж буйг судалж байгаа ч зөвхөн хаах нь хангалтгүй, хүүхдүүдийг сургах нь илүү чухал гэж үзсэн байна.

Түүний хэлснээр, НҮБ-тай хамтран эхлүүлсэн цахим бичиг үсгийн хөтөлбөрт 100 мянга гаруй хүн хамрагджээ.

Форумд 50 гаруй орон, тэр дундаа Узбекистан нэгдсэн Хүүхэд нэгдүгээрт тунхаглалыг танилцуулжээ. Баримт бичиг 2045 он гэхэд эрүүл мэнд, хоол тэжээл, боловсрол, хүчирхийллээс хамгаалах, цахим орчин дахь хүүхдийн сэтгэл зүйн сайн сайхан байдал гэсэн таван чиглэлийн гол хоцрогдлыг хоёр дахин бууруулах зорилт тавьсан юм.