Японд уяман өвчнөөр шаналж байсан ахмадууд арав орчим жилийн дараа амьдралаа дахин ярьж эхэлжээ

Гүнма мужийн Кусацу дахь уяман буюу Хансений өвчтэй хүмүүсийг хорьж байсан үндэсний музейд өвчнөөр шаналж байсан ахмадууд арав орчим жилийн завсарлагын дараа өөрсдийн түүхийг зочдод дахин ярьж эхэлснийг Кёдо агентлаг мэдээлжээ.

Үндэсний Курю Ракусэнэн сувиллын дэргэдэх Жюканбо музейн хөтөлбөрт наян, ерэн настай дөрвөн оршин суугч оролцож, нэгдүгээр сараас наймдугаар сарын эцэс хүртэл найман удаа уулзалт хийсэн байна. Хөтөлбөр сувиллын оршин суугчид хөгширч, Ковид-19 цар тахал дэгдсэнээс болж зогссон байв.

Тэдний нэг, 82 настай Сатоши Касай 14 настайдаа өвчтэй гэж оношлогдож, 1959 оны дөрөвдүгээр сард сувилалд оржээ. Гэр бүлээ ялгаварлалаас хамгаалахын тулд овгоо сольсон ч өнгөрсөнтэйгээ холбоогоо алдахгүйн тулд нэрээ хадгалсан юм.

«Хансений өвчний өнгөрсөн ба одоог аль болох олон хүн ойлгоосой гэж хүсэж байна» гэж Касай хэлжээ.

Тэрбээр эмчилгээ үр дүнгээ өгсний дараа сувиллаас гарч, Өөрийгөө хамгаалах хүчинд ажилласан ч шинж тэмдэг дахин илэрснээр ажлаасаа гарахаас аргагүй болсон. Хүмүүстэй бага харьцахын тулд ачааны машины жолоочоор олон жил ажиллаж, өвчнөө нуухаар найз нөхөддөө Кусацуд зочид буудлын менежер байсан гэж худлаа хэлдэг байжээ.

Эцэг эх, ах дүүсийн ихэнх нь нас барсан тул өнгөрсөн тухайгаа ярих цаг нь болсон гэж тэрээр үзсэн байна.

2027 оны гуравдугаар сар хүртэл дахин дөрвөн уулзалт хийхээр төлөвлөсөн бөгөөд оролцоо үнэ төлбөргүй ч музейн цахим хуудсаар урьдчилан бүртгүүлэх шаардлагатай.