Европын парламентын гишүүд Фронтекст сошиал сүлжээг хянах эрх олгох саналыг шүүмжилжээ

Европын холбооны хилийн хамгаалалтын агентлаг Фронтекст сошиал сүлжээг хянах шинэ эрх олгох санал үг хэлэх эрх чөлөөнд заналхийлж байна гэж Европын парламентын гишүүд болон иргэний нийгмийн бүлгүүд мэдэгджээ. Энэ тухай Политико Юроп мэдээлэв.

Европын комиссын мягмар гарагт танилцуулсан эргийн болон хилийн хамгаалалтын агентлагийн томоохон шинэчлэлийн саналд ЕХ руу хууль бусаар хил нэвтрэхэд тус дөхөм болох, уриалсан мэдээллийг сошиал сүлжээнээс хянах өргөн, тодорхой бүрэн эрх багтжээ.

Италийн социал демократ гишүүн Брандо Бенифей хүний наймааны онлайн зарыг эрх баригчид устгах нь «хууль ёсны» гэж үзсэн ч «сошиал сүлжээг хянах өргөн бүрэн эрх үүнээс хамаагүй хол очиж, онлайн үг хэллэгийг хилийн агентлагийн хяналтад оруулж байна» гэжээ. Тэрбээр 2019 онд ижил төстэй эрхтэй хяналтын тендерийг хувийн нууцыг зөрчсөн гэх шүүмжлэлийн улмаас цуцалсныг сануулсан байна.

Саналын дагуу Фронтекс сошиал сүлжээг хянах дотоод бүтэц байгуулж, ЕХ-ны орнуудад хууль бусаар нэвтрэхэд тус дөхөм болж буй гэж үзсэн агуулгыг тухайн платформд мэдэгдэх юм. Мөн агентлаг Дижитал үйлчилгээний тухай хуулийн дагуу итгэмжлэгдсэн мэдээлэгчийн статус авах хүсэлт гаргаж, түүний мэдэгдсэн агуулгыг платформууд нэн тэргүүнд авч үзэх болно.

Польшийн баруун жигүүрийн гишүүн Пиотр Мюллер «Фронтекс хүний наймаачдын араас хөөцөлдөх ёстой болохоос цагаачлалын талаарх үзэл бодлыг хянах ёсгүй» гэжээ. Харин Ирландын төв баруун үзэлтэй гишүүн Регина Доэрти цагаачлалын байгууллагуудад хилийн шинэ аюул заналд хариу үйлдэл үзүүлэх хэрэгсэл хэрэгтэй гэж үзсэн байна.

Фронтексийн дарга асан, Францын хэт барууны Үндэсний эвсэл намын гишүүн Фабрис Леджери шинэ эрх нь Комиссын дарга Урсула фон дер Ляйений Европт үг хэлэх эрх чөлөөг хязгаарлах оролдлого гэж шүүмжилжээ. Европын комисс энэ талаар тайлбар өгөөгүй байна.