17 настай Ваэль Мохья Германы хөлбөмбөгийн түүхэнд нэрээ үлдээж магадгүй

Боруссия Мёнхенгладбах клубийн 17 настай тоглогч Ваэль Мохья Германы шигшээ багт ийм эрт дуудагдана гэж өөрөө ч төсөөлөөгүй байх гэж Дойче Велле бичжээ. Тэрбээр 12 дугаар сарын 31-нд 18 нас хүрнэ.

“Мэдээж би маш их баярласан. Энэ миний хувьд маш их утга учиртай. Хүн бүр хэзээ нэгэн цагт шигшээ багт сонгогдохыг мөрөөддөг гэж бодож байна” гэж Мохья хэлжээ.

Техник сайтай, бүтээлч тоглогч Мохья энэ улиралд Бундеслигийн есөн тоглолтод хоёр гоол оруулж, нэг гоолын дамжуулалт өгсөн байна. Тэрбээр 2025 оны 12 дугаар сард Вольфсбургийн эсрэг 16 нас 347 хоногтойдоо тоглож, клубийнхээ түүхэн дэх Бундеслигт тоглосон хамгийн залуу тоглогч болсон юм.

Мохья мөн Мёнхенгладбах дахь бага сургуульд нэг жил нийгмийн сайн дурын ажил хийж, хүүхдүүдэд хоол түгээж, гэрийн даалгавар хийхэд нь тусалж, тэдэнтэй тоглодог байжээ. Нэрийг нь зөв дуудаж чадаагүй нэгэн охин түүнийг Вафли гэж нэрлэснээс хойш энэ нь түүний хоч болон үлдсэн аж.

Мохьягийн эцэг эх Мароккогоос гаралтай тул тэрбээр тус улсын иргэншилтэй бөгөөд Мароккогийн шигшээ багт тоглох боломжтой байсан ч үүнээс татгалзжээ. Мароккогийн хөлбөмбөгийн холбоо түүнийг өнгөрсөн жилээс идэвхтэй урьж, 2026 оны дэлхийн аварга шалгаруулах тэмцээний өмнө ч холбогдож байсан юм.

“Түүнтэй хийсэн яриа маш сайхан байсан. Би 17 настайдаа тийм өөртөө итгэлтэй байгаагүй, гэхдээ тийм сайн тоглогч ч биш байсан” гэж Германы шигшээ багийн ахлах дасгалжуулагч Юрген Клопп инээн хэлжээ.

Мохья Үндэстнүүдийн лигийн удахгүй болох тоглолтод тоглох юм бол Германы шигшээ багийн орчин үеийн түүхэн дэх хамгийн залуу тоглогч болно. Одоогоор энэ амжилт 1954 онд 17 нас 345 хоногтойдоо тоглосон Гамбургийн домогт тоглогч Уве Зеелерийнх юм. Мохьягийн Боруссия Мёнхенгладбахтай байгуулсан гэрээ 2028 он хүртэл хүчинтэй.