АНУ Украинд 500 Пэтриот пуужин худалдахыг зөвшөөрөв

Дональд Трампын засаг захиргаа Баасан гарагт Украинд 500 Пэтриот пуужин худалдахыг зөвшөөрснийг АНУ-ын Төрийн департамент мэдэгджээ. Энэ тухай Франс Твенти Фор телевиз мэдээлэв.

Пэтриот пуужин бол Украинд Оросын дрон, пуужинг саатуулахад хэрэглэдэг хамгийн чухал зэвсгийн нэг юм.

Шийдвэрийг Конгресс хянан хэлэлцэх юм. Украины эрх баригчид саатуулагч пуужингийн нөөц багассаар байна гэж хэдэн долоо хоногийн турш гомдоллосны дараа уг зөвшөөрөл гарчээ.

«Санал болгож буй худалдаа нь агаарын болон пуужингийн нэгдсэн хамгаалалтыг сайжруулснаар Украины одоогийн болон ирээдүйн аюулыг сөрөх чадавхыг дээшлүүлнэ» гэж Төрийн департамент мэдэгдэлдээ дурджээ. Харин зэвсгийг Украинд хэзээ хүргэх талаар мэдэгдэлд дурдаагүй байна.

Төрийн департаментын хэлснээр, худалдааны төлбөрийг АНУ-ын төсвөөс бус, Украины холбоотнуудын хандиваар санхүүжүүлэх юм. Мөн уг хэлцэл Европт улс төр, эдийн засгийн тогтвортой байдлыг хангахад хувь нэмэр оруулдаг түнш орны аюулгүй байдлыг сайжруулж, АНУ-ын гадаад бодлого, үндэсний аюулгүй байдлын зорилтод нийцнэ гэж тус байгууллага үзжээ.

Гэвч Зеленский Баасан гарагийн орой X сүлжээнд нийлүүлэлт зөвхөн хэдэн жилийн дараа эхэлж магадгүй гэж бичсэн байна. Тэрбээр бодит аюул нүүрлэж, саатуулагч пуужин хэрэглэх бодит шаардлага гарах үеийн шийдлийг олохыг Америкийн түншүүдээсээ хүсчээ.

Украины удирдагч АНУ болон Европын холбоотнууд одоо нөөцөлж буй пуужнаа Украинд өгч, дараа нь шинэ худалдан авалтаар нөхөж болох юм гэсэн санал дэвшүүлжээ.

Энэ сарын эхээр Вашингтон Оростой дизель түлшний хэлцэл хийсний дараа АНУ, Украины харилцаа хурцадсан юм. Украин мөн АНУ хиймэл дагуулын интернэтэд нэвтрэх боломжийг нь удаашруулж, тагнуулын зарим мэдээлэл солилцохоо зогсоосон гэж мэдэгдэж байв.

Зеленский 10 дугаар сарын 20-нд Осло хотод АНУ-ын элч нартай хэлэлцээ хийсний дараа хурцадмал байдал намжсан байна.