ANZ-ийн тэргүүн: Дэлхийн зах зээл “аюултай нөхцөлд” байна

Хувьцааны зах зээл түүхэн дээд түвшинд байхад хүү өсөж буй нь “аюултай нөхцөл байдал” мөн гэж Австралийн ANZ банкны гүйцэтгэх захирал Нуно Матос анхааруулжээ.

Хиймэл оюун ухаан, дата төвийн бүтээн байгуулалтаас үүдэн дэлхий даяар хөрөнгийн төлөөх өрсөлдөөн ширүүсч, энэ нь зардлын супер мөчлөгийг тэтгэж байна гэж тэрбээр онцолсон байна.

Хөрөнгийн төлөөх энэ уралдаан, засгийн газрын өндөр зардал, өндөр бөгөөд буурахгүй байгаа инфляц, өсөж буй хүү зэрэг нь ноцтой асуудал болж байна гэж Матос үзэж байна.

“Бид амьдралдаа ийм хэмжээний зарцуулалт хэзээ ч харж байгаагүй. Дэлхий дээр тун сонин нөхцөл байдал үүсээд байна: технологи, хиймэл оюун ухааны давалгаанаас болж хувьцааны зах зээл түүхэн дээд түвшинд байхын зэрэгцээ хүү ч түүхэн дээд түвшинд байна” гэж тэрбээр ярьжээ.

Матос Канберрад болсон парламентын шалгалтын сонсголд мэдүүлэг өгчээ. Уг сонсголд Австралийн дөрвөн том банкны гүйцэтгэх захирлууд оролцоно.

Австралийн эдийн засаг ойрын хугацаанд мэдэгдэхүйц удааширна гэж Матос таамаглаж байгаа ч агшина гэж бодохгүй байгаагаа хэлжээ. Нөөцийн банкны ерөнхийлөгч Мишель Буллок ч өнгөрсөн долоо хоногт тус банк уналт болно гэж таамаглаагүйг мэдэгдсэн байна.

Гэхдээ хиймэл оюун ухааны бүтээн байгуулалт, хөрөнгийн төлөөх ширүүн өрсөлдөөнтэй холбоотой дэлхийн сөрөг цочрол Австралид ноцтой асуудал үүсгэж болзошгүй гэж Матос анхааруулжээ.

“Хэрэв дэлхий дээр хиймэл оюун ухааны, нэрлэе л дээ, түр уналт гарвал дэлхий нийтээрээ том асуудалтай тулгарна. Ийм зүйл болно гэж би бодож байна уу? Үгүй. Гэхдээ энэ боломжгүй зүйл биш” гэж Матос хэлэв.

Либерал намын гишүүн, хорооны дэд дарга Саймон Кеннедигийн асуултад хариулахдаа Матос “төрийн ч бай, хувийн ч бай” аливаа зардлыг танах нь инфляцын дарамтыг сулруулна гэжээ. Гэхдээ өндөр инфляц одоогоор дэлхий нийтийн үзэгдэл болоод байгааг тэрбээр онцолсон байна.

“Өнөөдөр дэлхийн засаг захиргаанууд хөрөнгө, ялангуяа урт хугацааны хөрөнгийн төлөө ширүүн өрсөлдөж байна. Засаг захиргаа зах зээлд гарах бүрдээ урт хугацааны хөрөнгө шаарддаг хиймэл оюун ухааны дэд бүтэцтэй өрсөлдөж байна. Энэ нь инфляц үүсгэж байна” гэж тэрбээр хэлжээ.

Матос мөн “хамгаалалтын хаалт”, “дэлхийн зохицуулалт” байхгүйгээр хиймэл оюун ухааныг өргөн нэвтрүүлэх нь аюултайг анхааруулав. “Хиймэл оюун ухаан харанхуй талтай” гэж тэрбээр гишүүдэд хэлсэн байна.

ANZ саяхан жилийн бэлэн мөнгөн ашгаа 7.59 тэрбум доллар гэж зарласан юм. Хорооны дарга, Хөдөлмөрийн намын гишүүн Эд Хюсикийн асуултад Матос “Тайлангийн дүнгээр 31 хувиар өссөн. Бодит дүнгээр 10 хувиар өссөн” гэж хариулжээ.

Австралийн том компаниудаас бусад хүн бүр одоогоор хүнд үеийг туулж байх шиг байна гэж Хюсик хэлсэн байна. Харин Матос том банкуудыг өмгөөлж, банкууд “нийгэмд өгөх үүргээ биелүүлж байна” гэв.

“Орон сууцны зээл бол Австралийн банкны салбарын хамгийн бага ашигтай бүтээгдэхүүний нэг бөгөөд наад зах нь сүүлийн 20 жилд жил ирэх тусам ашиг нь буурсаар ирсэн” гэж тэрбээр хэлжээ.