Австралийн Виктория мужид элэгний хүнд өвчтэй залуучуудын тоо өсөж байна

Австралийн Виктория мужид элэгний хүнд, эдгэршгүй өвчнөөр эмнэлэгт хэвтэх залуучуудын тоо нэмэгдэж байгааг Барнет хүрээлэнгийн шинэ тайлан харуулсан гэж Гардиан сонин мэдээлжээ.

Архины судалгаа, боловсролын сангийн захиалгаар хийсэн уг судалгаагаар 2017 оны 1 дүгээр сарын 1-ээс 2024 оны 6 дугаар сарын 30 хүртэлх 4111 удаагийн эмнэлэгт хэвтэлт, мөн 2010 оноос хойших эмнэлзүйн мэдээг шинжилжээ.

Ковидын хөл хорио 2020 оны 3 дугаар сард эхлэхэд архинаас үүдэлтэй гепатитаар эмчлүүлэгсдийн тоо огцом өсжээ. 2021 оны сүүлээр хязгаарлалтыг сулруулсны дараа өсөлт удааширсан ч тоо нь хорионоос өмнөх түвшнээс хамаагүй өндөр хэвээр байна.

Өсөлт нь хөл хорионы стресс, тодорхойгүй байдалтай холбоотой хэд хэдэн хүчин зүйлтэй давхцаж байгаа ч тайлан шалтгааныг тодорхой салгаж чадахгүй гэж судалгааны ахлагч, профессор Жессика Хауэлл хэлжээ. “Архийг гэрт нь хүргэж өгдөг болсноор хүртээмж нэмэгдсэн” гэж тэрбээр хэлэв.

Залуучууд ерөнхийдөө бага архи ууж байгаа ч цөөн хэсэг нь асар их хэмжээгээр ууж байгааг өмнөх судалгаанууд анзаардаггүй гэж Гриффитийн их сургуулийн элэг судлалын профессор Жеймс О'Бэйрн үзжээ.

Энэ дүн архины хүртээмж, зохицуулалт, зар сурталчилгааг хязгаарлах зэрэг хор хохирлыг бууруулах арга хэмжээ шаардлагатайг харуулж байна гэж сангийн гүйцэтгэх захирал Айла Чорли мэдэгджээ.

Архинаас үүдэлтэй гепатитаар хэвтэгсдийн 62.5 хувь нь эрэгтэй байсан ч эмэгтэйчүүдийн дунд огцом өсөлт гарчээ. Мужийн хэмжээнд хэвтэгсдийн 14 хувь нь 35-аас доош насныхан байв. Архинаас үүдэлтэй элэгний хүнд өвчтэй хүмүүсийн нэлээд хэсэг нь 40-өөс доош насныхан байна.