Ойн асуудлаарх дэлхийн удирдагчдын уулзалтад Их Британийн Гадаад хэргийн сайд Эд Милибэндийн хэлсэн үг

Юуны өмнө Ерөнхийлөгч Лулагийн ялалтыг тэмдэглэж буй энэ уур амьсгалын бага хуралд үг хэлж байгаа нь ямар их нэр төрийн хэрэг болохыг хэлмээр байна. Бид бүгд үүнд баяртай байгаа гэж бодож байна.

Ерөнхийлөгч өө, юуны түрүүнд хэлэхэд, бидний баярлаж буй шалтгаан бол таны ялалт уур амьсгалын төлөөх үйл ажиллагааны ялалт байсанд оршино. Таны ялалт ойн ялалт байв. Таны ялалт итгэл найдварын ялалт байв.

Та эхний болон хоёр дахь шатны санал хураалтын хооронд болсон үйл явдлаар бидэнд маш, маш чухал сургамж өгсөн. Та бууж өгсөнгүй. Та сэтгэлээр унасангүй. Та ялагдлын сэтгэлгээнд автсангүй. Өнөөдөр бид бүгд таныг хүндэтгэн мэндчилж байна.

Таны бидэнд өгч буй сургамж бол уур амьсгал, ойн асуудлаар ч бид бууж өгөх ёсгүй гэдэг юм. Учир нь бид уур амьсгалын төлөөх тэмцлийн шийдвэрлэх мөчид байна.

Үр дагаврыг нь бид эргэн тойрондоо харж байна. Бид 1.5 хэмийн хязгаараас давна гэсэн шинжлэх ухааны судалгааг харж байна.

Ялагдлын сэтгэлгээтэй хүмүүс арга хэмжээ авах утгагүй гэж хэлэх болно. Тэд буруу. Учир нь дэлхийн дулаарлыг хэмийн өчүүхэн хэсгээр бууруулах бүрд хүний амь аврагдаж, байгаль хамгаалагдаж, хойч үеийнхэн илүү сайн амьдрах болно.

Энэ нь ялангуяа ойн хувьд үнэн.

Ой бол хур тунадас, усан хангамж, хүнсний үйлдвэрлэл, эрс тэс цаг агаараас хамгаалахад, хамгийн гол нь өнөөдөр бидэнтэй хамт байгаа, миний бас хүндэтгэн мэндчилж буй ойн ард түмэнд зайлшгүй шаардлагатай байгалийн чухал дэд бүтэц юм.

Тэгвэл бид юу хийх ёстой вэ?

Нэгдүгээрт, бид ойн санхүүжилтийг хангах үүрэг хүлээх ёстой.

Халуун орны ой мөнх оршин тогтнох сан бол өнгөрсөн жил Бразилийн даргалалтын санаачилга байв. Их Британиас ирсэн бидний зарим нь нэг жилийн өмнө тус санд оруулах хувь нэмрээ зарлана гэж найдаж байсан ч зарлаж чадаагүй гэдгийг хэлж болно.

Гэхдээ Их Британид “хожимдсон ч хийгээгүйгээс дээр” гэсэн хэллэг байдаг.

Тиймээс Их Британи 9 дүгээр сард тус санд 400 сая фунт стерлинг хүртэлх хөрөнгө оруулах бодолтой байгаагаа зарласан.

Өнөөдөр би Нидерланд болон тэргүүлэх буяны үйлстнүүдийн зарласан хувь нэмрийг халуунаар сайшааж байна.

Ерөнхийлөгч Лулагийн өнгөрсөн жил бидэнд хэлсэнчлэн энэ бол маш, маш чухал санаачилга. Энэ нь зөвхөн буцалтгүй тусламж биш, хөрөнгө оруулалтын тухай юм. Энэ нь богино хугацааны санаачилга биш, урт хугацааны сангийн тухай юм.

Халуун орны ой мөнх оршин тогтнох сан бол цаг нь болсон санаа бөгөөд бусад газарт ч давтан хэрэгжүүлэх талаар бодох ёстой санаа юм.

Танхимд байгаа хувийн хэвшил, засгийн газар, буяны үйлстэн бүхнийг тус санг дэмжихийг уриалж байна.

Бид мөн өмнө нь яригдсан Ойн санхүүжилтийн замын зураглалыг бүрэн хэрэгжүүлж, улс орон, орон нутгийн иргэд ойг хамгаалснаар хөгжин цэцэглэх боломжийг хангах ёстой.

Миний хэлэх хоёр дахь санаа бол дэлхийн ойг арчлан хамгаалж буй хүмүүсийг бид дэмжих ёстой гэдэг юм.

Эцсийн эцэст ойг тунхаглал бус, хүмүүс буюу уугуул иргэд, орон нутгийн иргэд хамгаалдаг.

Үүнийг хүлээн зөвшөөрч, өнгөрсөн жил Белен хотод түншүүд газар эзэмшлийн тухай түүхэн үүрэг амлалтыг тохиролцсон.

Их Британи үүнийг дэмжих хэрэгжилтийн төлөвлөгөөгөө одоо боловсруулж дуусгасан бөгөөд бид Ойн газар эзэмшлийн амлалт, Дэлхийн ойн санхүүжилтийн амлалтын хүрээнд үүргээ давуулан биелүүлж, 14 тэрбум гаруй ам.доллар дайчилснаа хэлэхэд таатай байна.

Эцэст нь, дэлхий даяар болж буй үйл явдлыг харгалзан бид ойг өөрт нь тулгарч буй аюулаас хамгаалах ёстой.

Зөвхөн 2026 оны эхний гурван сард дэлхий даяар 150 сая гаруй га газар шатжээ.

Бид олон улсын хамтын нийгэмлэгийн хувьд хамтдаа гамшигт ойн түймрийг хянаж, тайлбарлаж, урьдчилан таамаглах шилдэг мэдлэг туршлагыг дайчилж, цаг алдалгүй арга хэмжээ авах ёстой.

Үүний жишээ бол Их Британийн шинжлэх ухааны мэдлэг, олон улсын хамтын ажиллагааны дэмжлэгтэй гарсан 2026 оны Ойн түймрийн байдлын тайлан, мөн Турк, Бразил, Солонгосын тэргүүлсэн Антальягийн үйл ажиллагааны төлөвлөгөө юм.

Энэ бол хямралд түр зуур, богино хугацаанд хариу арга хэмжээ авдаг байдлаас ойн түймрээс урьдчилан сэргийлж, бэлэн байдлыг бэхжүүлэх рүү шилжих алхам юм.

Төгсгөлд нь Гайанагийн Дэд ерөнхийлөгч Жагдеод талархал илэрхийлье.

Бид Ой, уур амьсгалын манлайлагчдын түншлэлийн хамтарсан даргалалтыг Герман, Коста Рикад хамтдаа шилжүүлж, бамбараа дамжуулж байна.

Бид үүнийг итгэлтэйгээр хийж, хамгийн чухал зарчмыг баталж байна.

Бусад хүмүүс, ялангуяа миний найз Норвегийн Ерөнхий сайд дурдсанчлан, бидний хувь заяа дэлхийн хэмжээнд холбоотой.

Бразилийн Амазон, Конгогийн сав газар, Зүүн өмнөд Азийн ой, Их Британийн Шотландын өндөрлөг газар, Коста Рикагийн үүлэн ой, Германы Хар ой.

Эдгээр ой энэ холбоог бэлгэдэж байна.

Энэ бол Ой, уур амьсгалын манлайлагчдын түншлэлийн зарчим.

Энэ бол ойн зарчим.

Энэ бол бидний нийтлэг хүн чанарын зарчим.

Бид бүгд холбоотой. Үүнийг хэзээ ч бүү мартъя.

Танд маш их баярлалаа.