Бэлгийн дарамт үйлдсэн гэх буруутгал гарсны дараа Дэвид Уоллиамсын богино дүрийг Австралийн киноноос хасчээ

Хүүхдийн зохиолч, телевизийн хөтлөгч Дэвид Уоллиамсын номоор бүтээсэн Австралийн удахгүй гарах киноны түгээгчид бэлгийн дарамтын тухай буруутгал олон нийтэд ил болсны дараа түүнийг кино болон сурталчилгааны ажлаас хасахаар болсныг баталсан гэж Гардиан сонин мэдээлжээ.

“Финг!” хэмээх хүүхдийн уран зөгнөлт киноны хамтран зохиогч Уоллиамс 1 дүгээр сарын 14-ний нээлтийн өмнөх хэвлэл мэдээллийн кампанит ажилд оролцохгүй бөгөөд киноны продюсерууд түүний богино дүрийг хассан гэж Трансмишн Филмс компани мэдэгджээ.

Гардиан сонины Их Британийн хэвлэл Ай Ти Ви Ньюстэй хамтран хийсэн сурвалжилгаар Уоллиамс зарим нь дөнгөж 15 настай байхад нь танилцсан шүтэн бишрэгчдээ уруу татсан, олон жилийн турш ажлын байранд эмэгтэйчүүдийг дарамталсан гэх буруутгал ил болжээ. Тэрбээр буруутгалыг үгүйсгэж байна.

55 настай Уоллиамсын өмгөөлөгчид энэ оны эхээр буруутгалыг нийтлүүлэхгүй байхаар Английн Дээд шүүхийн анхан шатны танхимд хандсан ч шүүх нэхэмжлэлийг хэрэгсэхгүй болгосон юм.

Стан стриминг үйлчилгээ киног цаашид үзүүлэхгүй гэдгээ баталсан бол АНУ дахь түгээгч Энжел Студиос Уоллиамсын дүрийг хасаж, түүнийг АНУ-ын сурталчилгааны материалаас ч хасахаар болжээ.

Их Британи, Ирландад киног түгээх эрхтэй Скай компани киноноос бүрмөсөн татгалзсан байна.

Тайка Вайтити, Миа Васиковска нарын тоглосон уг кино Уоллиамсын 2019 оны номоор бүтээгдсэн бөгөөд бусад орны үзэгчдэд хүрэх эсэх нь тодорхойгүй хэвээр байна.