Барилгын цалингийн бодлого өртгийг өсгөсөн гэсэн дүгнэлт гарсны дараа Квинсландын лейборист удирдагч уучлалт гуйлаа
Квинсландын барилгын салбарт үйлдвэрчний эвлэлийн зүй бус үйлдэл гэх асуудлыг шалгаж буй комисс завсрын тайлангаа нийтэлжээ.
Австралийн Квинсланд мужийн сөрөг хүчний удирдагч, Лейборист намын Стивен Майлз мөрдөн шалгах комиссын дүгнэлт гарсны дараа уучлалт гуйжээ. Тус намын маргаантай цалингийн бодлого татвар төлөгчдийн мөнгөөр санхүүжсэн гурван томоохон төслийн өртгийг өсгөсөн гэж барилгын салбарын үйлдвэрчний эвлэл CFMEU-гийн асуудлаарх комисс дүгнэсэн байна.
ABC News сайтын мэдээлснээр, Стюарт Вуд тэргүүтэй мөрдөн шалгах комисс Квинсланд дахь үйлдвэрчний эвлэлийн зүй бус үйлдэл гэх асуудлыг шалгаж байгаа юм. Комиссар Вуд нийтэлсэн завсрын тайландаа төрийн төслүүдийн цалин, ажлын нөхцөлийг тогтоосон өмнөх засгийн газрын бодлогыг хатуу шүүмжилжээ.
Тэрбээр уг бодлогыг “хор хөнөөлтэй” гэж нэрлэжээ. Комиссарын дүгнэлтээр уг бодлого мөрдөн шалгалтад хамрагдсан Брисбэний голын доогуурх төмөр зам, Centenary гүүрний шинэчлэл, Голд Костын хөнгөн төмөр зам гэсэн гурван төслийн барилгын зардлыг дор хаяж 20 хувиар өсгөсөн байна. Төслүүдийн саатлын зардлыг оруулаагүй тул бодит хохирол үүнээс их байж болзошгүй гэж комиссар анхааруулав.
Өмнөх Ерөнхий сайд Аннастейша Палащукийн үед нэвтрүүлсэн уг бодлогын хариуцлагыг хүлээж байгаагаа Майлз Пүрэв гарагт хэлсэн ч бодлого сайн санаатай байсан гэж үзжээ. “Боломжтой үедээ арга хэмжээ авсан ч илүү эрт авах боломжтой, авах ёстой байсныг хүлээн зөвшөөрч, илүү эрт арга хэмжээ аваагүйдээ уучлалт гуйж байна” гэж тэрбээр хэлэв.
Кризафулли тэргүүтэй засгийн газар 2024 онд эрх барьж эхэлснийхээ дараахан уг бодлогыг түдгэлзүүлсэн юм. Засгийн газар одоо барилгын салбарыг шинэчлэх шинэ дүрэм батлах, уг дүрмийг хэрэгжүүлэх тусгай зохицуулагч байгуулах тухай комиссарын хоёр яаралтай зөвлөмжийг хэлэлцэж байна.
Засгийн газар барилгын дүрэм нэвтрүүлэхээ аль хэдийн амласан бөгөөд үүнийг хууль батлалгүйгээр засгийн газрын бодлогоор хэрэгжүүлж болно гэж орлогч Ерөнхий сайд Жаррод Блейжи хэлжээ. Шинэ дүрэм барилгын талбай дахь дээрэлхэх, айлган сүрдүүлэх явдалтай тэмцэхийн зэрэгцээ ажлын байрны аюулгүй байдал, эвлэлдэн нэгдэх эрх чөлөөг хамгаална гэж тэрбээр нэмж хэлсэн байна.
Засгийн газар уг бодлогыг цуцалсан ч уг бодлогын дагуу байгуулсан олон гэрээ хүчинтэй хэвээр байгаа бөгөөд ойрын 12 сарын хугацаанд аажмаар дуусна гэж Master Builders Queensland байгууллагын дэд захирал Майкл Хопкинс анхааруулжээ.
