Бельгийн хаан Ерөнхий сайд Барт де Веверийн огцрох хүсэлтийг хүлээж аваагүй байна

Бельгийн хаан Филипп Баасан гарагт Ерөнхий сайд Барт де Веверийн огцрох хүсэлтийг хүлээж авалгүй, энэ долоо хоногт гацаанд орсон төсвийн хэлэлцээг нэн даруй сэргээхийг түүнээс хүссэнийг Политико Юроп сайт мэдээлжээ.

Хаан эвслийн засгийн газрыг бүрдүүлдэг таван намын удирдагчидтай уулзаж, Де Веверийн удирдлага дор тохиролцоонд хүрэх боломж байсаар байна гэж дүгнэжээ.

Хааны ордны мэдэгдлээр таван намын удирдагч тохиролцоонд хүрэхийн тулд буулт хийхэд бэлэн байгаагаа албан ёсоор амласан байна.

Фламандын социалист Вооруйт нам өндөр орлоготой хүмүүс илүү татвар төлөх ёстой гэж шаардаж байгаа бол франц хэлт төв-барууны Шинэчлэлийн хөдөлгөөн үүнийг эсэргүүцэж, нэмэгдсэн өртгийн албан татварын шинэчлэлийг ч хүлээн зөвшөөрөхгүй байна. Де Вевер энэ долоо хоногт улс шинэ оныг яаралтай төсвөөр эхлүүлэхээс өөр аргагүй болсныг баталжээ.

Яаралтай төсвийн журмаар засгийн газар өмнөх жилийн төсвийн арван хоёрны нэгийг сар бүр зарцуулах эрхтэй. Ерөнхий сайд 11 дүгээр сарын 16-нд хаантай дахин уулзаж, явцын талаар тайлагнах юм.